Qýańshylyq saldary: Pavlodardaǵy egis alqaptarynyń 10 paıyzy nashar jaǵdaıda
PAVLODAR. KAZINFORM — Egistik jerlerdiń 78 paıyzynyń jaǵdaıy ǵana qanaǵattanarlyq dep tanylyp otyr. Arnaıy komıssııa aýyrtpalyqqa ushyraǵan aýdandardy aralap, nashar jaǵdaıdaǵy egistikterdi anyqtap jatyr.
Óńirlik aýyl sharýashylyǵy basqarmasynyń mamandary jaz basynan beri turyp alǵan aptap ystyq pen qýańshylyq jergilikti fermerlerdi qıyn jaǵdaıǵa qaldyrǵan málimdedi.
— 40 kúnnen astam ýaqyt boıy jaýyn-shashyn jaýmaı, qurǵaq ári ystyq aýa raıy saqtalyp keldi. Bul egin sharýashylyǵyna aıtarlyqtaı teris áser etip otyrǵany baıqalady. Qurǵaqshylyq saldarynan oblystaǵy egistik jerlerdiń shamamen 10 paıyzy nashar jaǵdaıda. Egistik jerlerdiń 78 paıyzynyń jaǵdaıy qanaǵattanarlyq dep sanalsa, 15 paıyzynyń jaǵdaıy jaqsy dep tanylyp otyr, — dep habarlady Kazinform tilshisine Pavlodar oblystyq aýyl sharýashylyǵy basqarmasynyń bólim basshysy Esentaı Múrsálimov.
Mamandar qazirgi ýaqytta egistigi qýańshylyqtan nashar jaǵdaıǵa túsken dep kórsetilgen aýdandarmen jumys istep jatyr. Egin alqaptary arnaıy komıssııanyń shyǵýymen tirkelip, akti toltyrylady. Keıin aýdan basshysynyń qaýlysymen nemese buıryqpen ónim joıylǵan bolyp sanalady.
Eske sala keteıik, Almaty, Batys Qazaqstan, Jambyl, Qostanaı, Qyzylorda, Soltústik Qazaqstan, Túrkistan oblystarynyń, Jetisý oblysy men Shymkent qalasynyń aýyl sharýashylyǵy taýaryn óndirýshileri egin oraǵy naýqanyna kiristi.
