Qýańshylyq pen aptap ystyq Germanııa fermerlerin jem-shóp tapshylyǵyna ushyratty
ASTANA. KAZINFORM — Uzaqqa sozylǵan qýańshylyq pen anomaldy aptap ystyq Germanııada mal azyǵynyń tapshylyǵyna ákeldi. Birqatar óńirde fermerler maldy josparlanǵan merzimnen erterek soıýǵa májbúr bolyp otyr, dep habarlaıdy Kazinform agenttigi BELTA-ǵa silteme jasap.
Baden-Vıýrtemberg fermerleri qaýymdastyǵynyń málimetinshe, qazir sharýashylyqtardaǵy jem-shóp qory jyldyń osy kezeńindegi qalypty deńgeıden 30–40%-ǵa tómen.
Qýańshylyq saldarynan shabyndyqtar qýrap, jańa shóp is júzinde óspeı qaldy. Bul fermerlerge aldaǵy aptalarda jem-shóp qoryn tolyqtyrýǵa múmkindik bermeı otyr.
Sonyń saldarynan sharýashylyqtar mal basyn qysqartýǵa jáne janýarlardy josparlanǵan merzimnen erterek soıýǵa jiberýge májbúr. Qazirdiń ózinde mal soıý oryndarynda kezek paıda bolǵan.
Ásirese Bavarııada — Frankonııa, Tómengi Bavarııa jáne Joǵarǵy Pfalts óńirlerinde jaǵdaı kúrdeli. Qoldaý sharalarynyń biri retinde Aýyl sharýashylyǵy mınıstrligi jem-shóp óndirýge arnalǵan qosymsha jer ýchaskelerin bóldi.
Fermerler qaýymdastyǵy jaǵdaıdy óte kúrdeli dep baǵalaǵan.
Gessendegi aýyl sharýashylyǵy óndirýshileri de jem-shóp tapshylyǵyna tap boldy. Onda byltyrǵy jylmen salystyrǵanda soıylǵan mal sany qazirdiń ózinde artqan.
Bul rette qýańshylyq pen aptap ystyq áli de jalǵasyp jatyr. Bul aldaǵy ýaqytta aýyl sharýashylyǵyna túsetin qysymdy jáne jem-shóp qoryna qatysty qıyndyqtardy kúsheıtýi múmkin.
Kazinform úshin BELTA seriktes agenttigi usynǵan.
Sondaı-aq bıyl Germanııada aptap ystyq saldarynan 12 myńnan astam adam qaıtys bolǵany habarlanǵan edi.
