Qýanyshbek Muhanǵalıev BQO mádenıet basqarmasyn basqarady
ORAL. KAZINFORM - BQO ákiminiń ókimimen QR Mádenıet jáne aqparat mınıstrliginiń kelisimimen Qýanyshbek Janbolatuly Muhanǵalıev Batys Qazaqstan oblysy mádenıet, tilderdi damytý jáne arhıv isi basqarmasynyń basshysy bolyp taǵaıyndaldy.
BQO ákiminiń baspasóz qyzmetinen málim etkenindeı, Qýanyshbek Janbolatuly 1987 jyly Batys Qazaqstan oblysynda dúnıege kelgen.
Bilimi joǵary. Qurmanǵazy atyndaǵy Qazaq ulttyq konservatorııasyn dástúrli mýzykalyq óneri jáne Batys Qazaqstan ınnovatsııalyq-tehnologııalyq ýnıversıtetin memlekettik jáne jergilikti basqarý mamandyǵy boıynsha bitirgen.
Eńbek jolyn Ǵ.Qurmanǵalıev atyndaǵy Batys Qazaqstan oblystyq fılarmonııasynyń jáne Qurmanǵazy atyndaǵy Qazaq memlekettik akademııalyq halyq aspaptary orkestriniń artısi bolyp bastaǵan.
Ár jyldary QR Mádenıet jáne aqparat mınıstrligi Mádenıet komıtetiniń ınspektory, bas sarapshysy, Qurmanǵazy orkestriniń dırektory, Astana qalasy ákimdigi Táýelsizdik saraıy dırektorynyń mindetin atqarýshy qyzmetterinde boldy.
Sondaı-aq 2017-2019 jyldary Oral qalasy mádenıet jáne tilderdi damytý bóliminiń basshysy, 2021-2022 jyldary BQO mádenıet basqarmasy basshysynyń orynbasary boldy.
Qazirgi taǵaıyndaýǵa deıin BQO mádenıet, tilderdi damytý jáne arhıv isi basqarmasy basshysynyń orynbasary qyzmetin atqardy.
