«Qýanysh» voleıboldan el chempıonatynda «Jetisý» klýbyn jeńdi

ÓSKEMEN. KAZINFORM – Óskemen qalasynda voleıboldan áıelderdiń ulttyq lıga komandalary arasynda ótip jatqan Qazaqstan chempıonatynyń ekinshi týrynda senbi kúni ortalyq kezdesý «Jetisý» (Taldyqorǵan) men «Qýanysh» (SQO) arasynda boldy.

Buǵan deıin Marko Grshıch jattyqtyratyn taldyqorǵandyqtar 28 upaımen kósh basynda kele jatsa, Azamat Esimovtiń shákirtteri úzdik úshtikte edi.

Birinshi partııada «Qýanysh» 25:16 esebimen basym tússe, ekinshisinde «Jetisý» ese qaıyrdy – 25:17. Budan keıin soltústikqazaqstandyqtar úshinshi partııany (25:19) alsa, tórtinshisinde ese jiberip qoıdy – 23:25.

Sheshýshi, besinshi sette esep 2:5 bolǵan mezette «Qýanysh» sapyndaǵy Janna Syroejkına dopty oıynǵa sátti qosty – 6:5. Sosyn match sońynda da osy jaǵdaı qaıtalandy. Taldyqorǵandyqtar bes matchboldy paıdalana almaı, jeńilis tapty – 18:20. Qorytyndy esep – 3:2, «Qýanyshtyń» paıdasynda. 

Senbi kúni sondaı-aq «Almaty» aqtóbelikterdi 3:2 (21:25, 25:22, 17:25, 25:13, 16:14) tize búktirdi.

«Qaraǵandy» Pavlodardyń «Ertisinen» 3:0 (25:18, 25:14, 25:17) esebimen aılasyn asyrsa, «Turan» (Túrkistan) «Arý-Astanany» qapy qaldyrdy – 3:0 (25:13, 25:17, 25:23).

Sońǵy bolyp alańǵa óskemendik «Berel» men ulttyq lıgaǵa bıyl qosylǵan «Gratsııa KZ» (Oral) komandalary shyqty. Birinshi kezeńde qosalqy quram oıynshylaryn shyǵarǵan «Berel» oraldyqtarǵa ese jiberdi – 22:25. Sodan keıin negizgi quramdy qosýǵa týra keldi – 25:15, 25:11. 25:8. Jalpy esep – 3:1.

Týrnır kestesinde «Jetisý» 29 upaımen burynǵysha kósh bastasa, «Berel» (28 upaı) ekinshi orynda. Biraq óskemendikterdiń bir oıyny kem. «Qýanysh» 26 upaımen úshinshi satyda tur.

Jeksenbi kúni keıinge qaldyrylǵan «Berel» - «Arý-Astana» matchy ótedi. 

Eske sala keteıik, budan buryn voleıboldan Qazaqstan chempıonatynda «Jetisý» kósh basyna shyqqanyn jazǵan bolatynbyz.