Qýanysh Súleımenov Abaı oblysy ákiminiń orynbasary qyzmetinen ketti
SEMEI. KAZINFORM - Abaı oblysy ákiminiń orynbasary Qýanysh Súleımenov óz erkimen qyzmetinen ketti. Bul týraly ol áleýmettik jelidegi paraqshasynda jazdy.
Qýanysh Súleımenov jelidegi jazbasynda memlekettik qyzmettegi jumysyn óz erkimen aıaqtaǵanyn jetkizdi. Sondaı-aq áriptesterine, basshylyǵyna jáne óńir turǵyndaryna senim bildirgeni úshin alǵysyn bildirip, úsh jyl ishinde mol tájirıbe jınaǵanyn jáne árdaıym adal ári jaýapkershilikpen jumys isteýge tyrysqanyn atap ótti.
- Maǵan jańa oblystyń alǵashqy memlekettik qyzmetshisi ári máslıhat tóraǵasy bolý baqyty buıyrdy. Óńirdiń qalyptasýyna óz úlesimdi qosýǵa múmkindik berilgeni úshin myń alǵys, - dedi ol.
Qýanysh Serqazyuly 1973 jyly burynǵy Semeı oblysynyń Shar qalasynda týǵan. Semeı memlekettik ýnıversıtetiniń tarıh fakýltetin bitirdi.
Oqýyn Qazaq memlekettik zań akademııasynda, Semeı qalasyndaǵy Shákárim atyndaǵy memlekettik ýnıversıtette «Mal sharýashylyǵy ónimderin óndirý tehnologııasy» mamandyǵy boıynsha jalǵastyryp, aýylsharýashylyq ǵylymdarynyń magıstri atanǵan.
«Shalabaı» JShS bas dırektory qyzmetin atqardy. VII saılanǵan Abaı oblystyq máslıhatynyń hatshysy bolǵan.
2023 jyldyń naýryz aıynda Abaı oblystyq máslıhatynyń tóraǵasy qyzmetine saılanyp, 2024 jyldyń jeltoqsanyna deıin jumys istedi.
Al sodan soń osy ýaqytqa deıin Abaı oblysy ákiminiń orynbasary laýazymyn atqardy.
Eske salsaq, osyǵan deıin Asqar Іzbasovtyń áskerı-áýe kúshteriniń qolbasshysy laýazymyna taǵaıyndalǵany habarlanǵan.