Qýanysh Bıshimov Atyraý munaı óńdeý zaýytynyń bas dırektory bolyp taǵaıyndaldy
ASTANA. KAZINFORM – «Atyraý munaı óńdeý zaýyty» JShS («AMÓZ»JShS) qatysýshylarynyń kezekten tys jalpy jınalysynyń sheshimimen zaýyttyń Bas dırektory (Basqarma tóraǵasy) qyzmetine Qýanysh Bıshimov taǵaıyndaldy.
Jańa bas dırektordy kásiporyn ujymyna «QazMunaıGaz» UK AQ Apparat basshysy Alımuhammed Quttumurat-uly tanystyrdy. Q.Bıshimov ár jyldary keden organdarynda, QR Ekonomıka jáne saýda mınıstrliginde, QR Indýstrııa jáne saýda mınıstrliginde, QR Tótenshe jaǵdaılar mınıstrligi Memlekettik materıaldyq rezervter komıtetiniń «Rezerv»RMK-da jumys istedi.
«Petropavl aýyr mashına jasaý zaýyty» AQ Bas dırektory, «Atameken» UKP Basqarma tóraǵasynyń orynbasary, «Qazaqstan Injınırıng» UK» AQ Basqarma tóraǵasy qyzmetterin atqardy.
Kompanııa málimetinshe, bul taǵaıyndaýǵa deıin «Pavlodar munaı-hımııa zaýyty» JShS bas dırektory boldy.
QMG basshylyǵy Atyraý munaı óńdeý zaýytynyń jańa bas dırektorynyń aldyna operatsııalyq tıimdilikti arttyrý, jeńil munaı ónimderin shyǵarý kólemin ulǵaıtý, óndiristik protsesterdiń senimdiligi men energııa tıimdiligi deńgeıin arttyrý, ekologııalyq jobalardy odan ári iske asyrý, 2025 jyly josparly aldyn alý jumystaryn sapaly júrgizý jáne qyzmetkerlerge qolaıly ári qaýipsiz jaǵdaı jasaý jóninde naqty mindetter qoıdy.
Zaýyttyń turaqty jáne úzdiksiz jumysynyń mańyzy atap ótildi.
«Atyraý munaı óńdeý zaýyty» JShS qatysýshylarynyń kezekten tys jalpy jınalysynyń sheshimine sáıkes «AMÓZ» JShS burynǵy bas dırektory (Basqarma tóraǵasy) Ǵalymjan Jýsanbaevtyń ókilettigi merziminen buryn toqtatyldy.
Eske sala ketelik, budan buryn byltyrǵy qańtarda Ǵalymjan Jýsanbaev Atyraý munaı zaýytynyń bas dırektory bolǵan edi.
Alaıda, bir aıdan soń bas dırektor men bas ınjener arasynda daý týyndady. Osyǵan baılanysty «QazMunaıGaz» UK tarapynan qurylǵan arnaıy komıssııa Atyraý munaı óńdeý zaýytyna tekserý júrgizdi.
Tekserýden soń Atyraý munaı óńdeý zaýytynyń bas dırektory men bas ınjeneri qyzmetinen bosatyldy.
Al sáýirdiń basynda Abzal Dosjanov Atyraý munaı óńdeý zaýytynyń bas dırektory bolyp taǵaıyndalǵan edi.
Biraq zaýyttyń eks-bas dırektory Ǵalymjan Jýsanbaev quqyǵyn qorǵaý úshin sotqa júgindi. Maýsym aıynda Astana qalasynyń azamattyq ister jónindegi aýdanaralyq sotynyń sheshimimen Atyraý munaı óńdeý zaýytynyń burynǵy bas dırektory Ǵalymjan Jýsanbaevtyń quqyǵy qorǵaldy.
- Astana qalasynyń azamattyq ister jónindegi aýdanaralyq soty J.-nyń qatysýshylardyń kezekten tys jalpy jınalysynyń hattamasyn, eńbek shartyn buzý týraly buıryqtyń jaramsyz dep taný, bas dırektor laýazymyn qalpyna keltirý, májbúrli jumystan shyǵý ýaqyty úshin jalaqyny óndirip alý jáne moraldyq zııandy óteý týraly «AMÓZ» JShS-ne qatysty talabyn qarady. Talap qoıý eńbek shartynyń synaq merziminde jáne qyzmetkerdiń ýaqytsha eńbekke jaramsyzdyq kezinde buzylýymen negizdeldi. Sotpen eńbek shartynyń talaptary boıynsha talapkerge 6 aı synaq merzimi belgilengeni, alaıda shart 1 aı ótkennen keıin buzylǵany anyqtaldy. Osy quqyqtyq qatynastarǵa eńbek zańnamasy qoldanylady, - dep habarlady sottan.
Shildede Atyraý munaı óńdeý zaýytynyń jumystan qýylǵan bas dırektory ornyna qaıta otyrdy.
Aıta keteıik, QazMunaıGaz Atyraý munaı óńdeý zaýytynyń úlesin jekeshelendirý máselesine qatysty túsinikteme berdi.