Qýandyq Bıshimbaev 24 jylǵa sottaldy
ASTANA. KAZINFORM – Tek qazaqstandyqtardy ǵana emes, kórshi elderdi de eleń etkizgen Qýandyq Bıshimbaevqa qatysty sot protsesi aıaqtaldy. Sýdıa Aıjan Qulbaeva Saltanat Núkenovany óltirdi dep aıyptalǵan eks-mınıstrge 24 jyl jaza kesti.
«Jaza mólsheri týraly máseleni sýdıa men alqabıler ashyq daýys berý arqyly sheshti. Sot úkimimen Bıshimbaev 24 jylǵa, Baıjanov 4 jylǵa bas bostandyǵynan aıyryldy», - dedi sýdıa.
Bıshimbaev «qınaý» (110-baptyń 2-bóligi) jáne «asa qatigezdikpen adam óltirý» (99-baptyń 2-bóligi) baptarymen sottalǵanyn atap ótken jón.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q. Bıshimbaevtyń isi boıynsha alqabılerdi irikteý ótti.
29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.
Al, 16 sáýirde Qýandyq Bıshimbaevtiń isi boıynsha sot otyrysy ýaqytsha toqtatyldy.
