Qýandyq Bıshimbaevty qorǵaýshysy jazasyn óteý tártibin aýystyrýdy surady
TÚRKІSTAN. QazAqparat - Búgin Túrkistan oblysy Tólebı aýdandyq sotynda eks-mınıstr Qýandyq Bıshimbaevqa qatysty sot otyrysy bastaldy. Sottalǵan mınıstrdiń qorǵaýshysy onyń jazasyn óteý tártibin ózgertýdi surady, dep habarlaıdy QazAqparat tilshisi.
Tólebı aýdandyq sotynyń málimetinshe, qatań tártiptegi túrmede jazasyn ótep jatqan Qýandyq Bıshimbaevtyń qorǵaýshysynan talap-aryz túsken. «Búgin qylmystyq is boıynsha sot otyrysy bastaldy. Qorǵaýshy sottalǵan azamattyń jazasyn óteý tártibin ózgertýdi suraǵan. Biraq bul jerde merziminen buryn shartty túrde bosatý jaǵy qarastyrylmaıdy. Jazasyn óteý tártibin aýystyrý nemese úkimdi ózgerissiz qaldyrý jaǵyn isti qarap jatqan sýdıa sheshedi. Qorǵaýshynyń ótinishi boıynsha isti qaraý tústen keıin saǵat 16:00-ge qaldyryldy», - deıdi Tólebı aýdandyq sotynyń ókili.
Al, isti qaraý barysynda Qýandyq Bıshimbaev beıne baılanys arqyly qatystyryldy. Ázirge sot qandaı da bir naqty sheshim qabyldaǵan joq.
Aıta keteıik, osy jyldyń naýryz aıynda burynǵy Ulttyq ekonomıka mınıstri Qýandyq Bıshimbaev múlki tárkilenip, 10 jylǵa sottalǵan edi. Sonymen birge, ol ómir boıy memlekettik qyzmette jumys isteý quqyǵynan aıyrylǵan bolatyn. Sottalýshy qazir jazasyn Túrkistan oblysyna qarasty Tólebı aýdanyndaǵy qaýipsizdigi eń joǵary túzeý mekemesinde óteýde. Eske sala ketsek, 2017 jyldyń 10 qańtarynda Sybaılas jemqorlyqqa qarsy Ulttyq bıýro burynǵy Ulttyq ekonomıka mınıstri Qýandyq Bıshimbaevtyń ustalǵanyn habarlaǵan bolatyn. Ulttyq bıýrodan málim etkendeı, ol birqatar adammen aldyn ala kelisip, iri kólemde birneshe márte para aldy dep aıyptalǵan. Bıshimbaev Qyzylorda qalasynda áınek shyǵaratyn jáne óńdeıtin zaýyt salý barysynda «Orda Glass» JShS-nyń vedomstvolyq baǵynystaǵy kompanııasy men onyń merdigerlik uıymy «Shymkenthımmontaj» JShS arqyly 1 mlrd teńge jymqyrý qylmystyq shemasyn uıymdastyrdy dep aıyptalǵan bolatyn.
