Qýandyq Bıshimbaev sotta sońǵy sózin aıtty
ASTANA. QazAqparat - Búgin Astana qalalyq sotynda «Bıshimbaev isine» qatysty barlyq fıgýranttar sońǵy sózderin aıtty. Olarlyń ishinde eks-mınıstr Qýandyq Bıshimbaev ta bar, dep habarlaıdy QazAqparat tilshisi.
Aıta ketken jón, Q.Bıshimbaev bir saǵattan astam ýaqyt sóıledi. Óz sózinde eks-mınıstr aqsha urlyǵyna qatyspaǵanyn taǵy bir márte málimdedi. «Men óz elimniń patrıoty ekenimdi jaqsy bilemin. Sondyqtan jumys babynda memleket múddesin oılap, Ult kóshbasshysy, Memleket basshysy Nursultan Nazarbaev qoıǵan maqsat-mindetterdi oryndaýǵa tyrystym. Men «Bolashaq» baǵdarlamasy boıynsha AQSh-ta tamasha bilim alyp keldim. Sol úshin óz elime, Memleket basshysyna sheksiz alǵysymdy aıtamyn. Qaı jerde istesem de, elimizge, Memleket basshysy Nursultan Nazarbaevqa paıdaly bolýǵa tyrystym. Meniń otbasym da solaı tárbıeledi. El múddesine degen adaldyq, Memleket basshysyna degen adaldyq - maǵan berilgen tárbıeniń basty ózegi. Meniń atam, ákem, anam ómiriniń basym bóligin Otanyna, ǵylym men bilimdi damytýǵa arnady. Olar meni bilimge, eńbekke adal bolýǵa úıretti. Al meniń barlyq jetistikterim «Bolashaq» baǵdarlamasy aıasynda alǵan bilim men qajyrly eńbektiń arqasy», - dedi Q.Bıshimbaev.
Eks-mınıstr Memleket basshysy Nursultan Nazarbaevtan taǵy bir márte keshirim surady. Prezıdenttiń jastarǵa degen oń kózqarasy arqasynda qarapaıym bank qyzmetkerinen mınıstrge deıin kóterilgenin de jetkizdi.
Sondaı-aq Q.Bıshimbaev 1,1 mlrd teńgeni urlamaǵanyn, shyny zaýytynyń ýaqytynda salynbaǵany úshin bank-garant 4,5 mlrd teńgege jýyq aqshany tólep bergenin aıtyp ótti. «Men eshqandaı para alǵan joqpyn. Qurmetti sot, meni aqtaýdy suraımyn», - dep atap kórsetti ol.
Astana qalalyq soty «Bıshimbaev isin» qaraýdy aıaqtady. «Sot keńesýge kóshedi. 14 naýryzda shamamen saǵat 15:30-da sottyń úkimi jarııalanatyn bolady» , - dedi sýdıa Ádilxan Shaıxıslamov.
Aıta keteıik, ótken jyldyń basynda eks-mınıstr Qýandyq Bıshimbaev qamaýǵa alynǵan bolatyn. Tergeý materıaldaryna sáıkes, Q.Bıshimbaev «Báıterek» ulttyq holdınginiń basshysy bolyp turǵanda Qyzylorda qalasyndaǵy shyny zaýytynyń bir mıllıard teńgesin talan-tarajǵa salǵan. Atalǵan qarjy «Orda Glass» JShS jáne oǵan qarasty «Shymkenthımmontaj» JShS arqyly urlandy.
Budan bólek, eks-mınıstr «Nurly jol» baǵdarlamasyna qatysqan qurylys kompanııalarynan aqsha alǵany úshin aıyptalyp otyr. Osy iske qatysy bar birqatar azamattar óz kinásin moıyndady. Alaıda Qýandyq Bıshimbaev ózine taǵylǵan aıyppen kelispeı otyr.5 Buǵan deıin ol Prezıdenttiń aldynda kináli ekenin jetkizdi. Memlekettik aıyptaýshy ony 12 jylǵa sottaý qajet dep sanaıdy.
