Qýandyq Bıshimbaevtiń anasy sotta sóz aldy
ASTANA. KAZINFORM – Kúdikti Qýandyq Bıshimbaevtiń anasy Almıra Nurlybekova sot otyrysynda alǵash ret pikir bildirdi.
Astanada Qýandyq Bıshimbaevqa qatysty qylmystyq is boıynsha ashyq sot otyrysy jalǵasyp jatyr. Burynǵy Ulttyq ekonomıka mınıstri azamattyq nekedegi jubaıy Saltanat Núkenovany asa qatygezdikpen óltirdi dep aıyptalyp otyr.
Tústen keıingi sot otyrysyna jábirlenýshi Aıtbek Amangeldi jáne onyń ókilderiniń biri qatysqan joq. Jábirlenýshi taraptyń aıtýynsha, Aıtbek Amangeldiniń ata-anasy ózin jaısyz sezinip, jedel járdem shaqyrylǵan, Aıtbek sol sebepti sot zalynan shyǵyp ketken. Óz kezeginde sýdıa sot zalynan ruqsatsyz shyǵýǵa bolmaıtynyn aıtty.
«Ol kez kelgen ýaqytta kirip-shyǵa almaıdy. Ol úshin sottan ruqsat suraý kerek. Tártip bárine ortaq, úziliske deıin kútsin», - dedi sýdıa Aıjan Qulbaeva.
Búgin Q.Bıshimbaevty qorǵaýshy tarap sotta máskeýlik mamandardyń qorytyndysymen tanystyrdy. Qorǵaýshy Nazken Qusaıynova reseılik mamandardyń qorytyndysyn oqı otyryp, Saltanat Núkenovanyń basynan qannyń ketýi, ólimnen 3-4 apta buryn paıda bolǵan gematoma bolýy múmkin dep málimdeıdi.
Sondaı-aq, sot otyrysynda Qýandyq Bıshimbaevtyń anasy Almıra Nurlybekova sóıledi.
«Árıne, men zańger emespin, biraq máskeýlik mamandardyń qorytyndysyn qabyldamasańyz, ulymnyń ózin qorǵaý jolynda dálelder keltirýde konstıtýtsııalyq quqyǵyn shekteý dep sanaımyn. Buny ana retinde shyn júrekten aıtyp otyrmyn», - dedi kúdiktiniń anasy sýdıaǵa qaraı otyryp.
Sot otyrysy erteń saǵat 10:00-de jalǵasady.
Aıta keteıik, búgin túske deıin Qýandyq Bıshimbaevtiń isi boıynsha sot otyrysynan tikeleı taratylym ýaqytsha toqtatylǵan edi.
Oǵan sebep taraptardyń biri alqabılerdiń qatysýynsyz ótinishhat jasaýdy surady. Sol sebepten sýdıa translıatsııany toqtatý týraly sheshim qabyldady.
Qýandyq Bıshimbaevtyń isi boıynsha onlaın-kórsetilim reıtıngi keıbir serıaldardan asyp tústi.
Tikeleı efırge 250 myń kórermenniń bir mezgilde qosylýy boıynsha rekord tirkeldi. 25-44 jas aralyǵyndaǵy kórermender jalpy kórermen sanynyń 58%-yn qurap otyr.
