Qýandyq Bıshimbaev jazasyn óteıtin túrmege jóneltildi
ASTANA. KAZINFORM — Eks-sheneýnik Qýandyq Bıshimbaev jazasyn qatań rejımdegi kolonııada óteıtin boldy.
Іshki ister mınıstrligi qylmystyq-atqarý júıesi komıtetiniń habarlaýynsha, burynǵy mınıstr qamaýda otyratyn mekeme sot úkimine sáıkes belgilengen.
«Sottalýshy (Q. Bıshimbaev) sot úkimine sáıkes qaýipsizdigi barynsha joǵary mekemege joldandy. Sonymen qatar, Qylmystyq atqarý kodeksiniń 88-baby boıynsha sottalǵandar jazasyn óteý oryndaryna tirkeýge sáıkes jiberiledi», — delingen komıtettiń baspasóz qyzmeti taratqan aqparatta.
Sondaı-aq, komıtet Qylmystyq atqarý kodeksiniń 93-babyna sáıkes ózge aqparat jarııa etilmeıtinin habarlady.
Buǵan deıin Qylmystyq-atqarý júıesi komıtetiniń basshysy Qýandyq Bıshimbaev túzeý mekemesine ótkennen keıin qandaı jumys isteýi múmkin degen saýalǵa jaýap bergen edi.
Eske sala keteıik, burynǵy Ulttyq ekonomıka mınıstri Qýandyq Bıshimbaev azamattyq nekedegi áıeli Saltanat Núkenovany azaptap óltirdi degen aıyppen 24 jylǵa sottaldy.
