Qýandyq Bıshimbaev túrmede áli jumyssyz otyr

ASTANA. KAZINFORM – 24 jylǵa qamalǵan eks-sheneýnik Qýandyq Bıshimbaevqa túrmede áli  jumys tabylmaǵan. Bul týraly KursivMedia habarlaıdy.

Іshki ister mınıstrligine qarasty Qylmystyq-atqarý júıesi komıteti tóraǵasynyń orynbasary Jánibek Baımaǵanbetovtiń málimdeýinshe, burynǵy mınıstr Qýandyq Bıshimbaev jazasyn ótep jatqan mekemede qazir qurylys jumystary júrip jatyr.

– Mekemede qurylys jumystary júrip jatyr. Bıznes aımaq jumysshylarmen tolyq qamtylǵan. Ol jerde qosymsha tsehtar ashylýy kerek, sol kezde jańa jumys oryndary paıda bolady. Sol kezde mekemedegi barlyq sottalǵandy jumyspen qamtımyz. Qazir sottalǵandardyń 60%-y jumyspen qamtylǵan. Bul kórsetkishti 100%-ǵa jetkizýdi josparlap otyrmyz. Sottalǵandardy tańdap jumysqa ornalastyrmaımyz, – deıdi Jánibek Baımaǵanbetov.

Eske salsaq, eks-sheneýnik Qýandyq Bıshimbaevtiń jazany óteý mekemesinde jumysqa turmaǵany týraly byltyr kúzde habarlaǵan edik. 

Aıta keteıik, burynǵy Ulttyq ekonomıka mınıstri Qýandyq Bıshimbaevty áıelin azaptap, óltirgeni úshin kináli dep tapty. Ol 24 jylǵa bas bostandyǵynan aıyryldy.