Qýandyq Bıshimbaev sotta S.Núkenovanyń týystarynan keshirim surady
ASTANA. KAZINFORM – Eks-mınıstr Qýandyq Bıshimbaev búgingi sot otyrysynda qazanyń zardabyn jan-dúnıesimen sezinetinin aıtyp, marqum S. Núkenovanyń týystarynan keshirim surady.
«Shyn máninde maǵan sóz sóıleý óte qıyn. Men túsinem jáne eshqandaı keshirimnen úmittenbeımin. Biraq bul - meniń adamdyq boryshym. Myna jerde jábirlenýshiler, onyń (S. Núkenova - red.) týystary, ata-anasy otyr. Shynymdy aıtsam, alǵashynda onyń ólimin oı-sanammen qabyldaý qıyn boldy, - dep bastady ol. - Keshirim suraǵym keledi. Men eshqandaı keshirimnen dámetpeımin. Biraq bul - meniń ishki mindetim, jan-dúnıemniń úndeýi. Men bul joǵaltýdyń salmaǵyn baǵamdaımyn jáne oǵan qatysym bar ekenin túsinemin. Birinshi aıtqym keletini osy».
Sondaı-aq, ol ózine taǵylǵan aıypty nege ishinara ǵana moıyndaıtynyn túsindirdi.
«Ekinshiden, qurmetti alqabıler, meniń kináli emes ekenimdi, kinámdi moıyndamaıtynymdy aıta otyryp mynany túsindirgim keledi. Qurmetti, sot, protseske qatysýshylar, men ózimdi jubaıym Saltanatty asqan qatygezdikpen sanaly túrde oılastyryp óltirdi degen aıypty moıyndamaımyn», - dedi Qýandyq Bıshimbaev.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy. Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi, 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilendi. 11 naýryz kúni Astananyń Qylmystyq ister jónindegi mamandandyrylǵan aýdanaralyq sotynda is boıynsha aldyn ala tyńdaý ótti. Aldyn ala tyńdaý 12 naýryzda jalǵasty.
27 naýryzda elordanyń qylmystyq ister jónindegi mamandandyrylǵan aýdanaralyq sotynda Q. Bıshimbaevtyń isi boıynsha alqabılerdi irikteý ótti.
29 naýryzdaǵy sot otyrysynda marqum Saltanat Núkenovanyń aǵasy Aıtbek Amangeldi kýáger retinde jaýap berip, Qýandyq Bıshimbaev pen Saltanat Núkenovanyń arasyndaǵy alǵashqy urys-kerister qalaı bastalǵany týraly málimetter aıtty jáne marqumnyń bet-álpeti kógergen sýret kórsetti.
