Qýandyq Bıshimbaev ózine taǵylǵan aıyptardy moıyndamady
ASTANA. KAZINFORM – Burynǵy Ulttyq ekonomıka mınıstri Qýandyq Bıshimbaev ózine taǵylǵan aıyptardy moıyndamady.
«Taǵylǵan aıyptarmen kelispeımin. Іs alqabılerdiń qatysýymen qaralsa jáne sot BAQ ókilderiniń qatysýymen ashyq ótse», - dedi Qýandyq Bıshimbaev sot aldynda.
Buǵan deıin habarlaǵanymyzdaı, búgin Astanada Qýandyq Bıshimbaevtyń isi boıynsha aldyn ala tyńdaý ótip jatyr. Oǵan QR Qylmystyq kodeksiniń 99-baby 2-bóligi 5-tarmaǵy boıynsha adam óltirý, qasaqana, asa qatygezdikpen adam óltirý, Qylmystyq kodekstiń 110-baby 2-bóligi 1-tarmaǵy boıynsha materıaldyq jaǵynan táýeldi adamdy júıeli túrde uryp-soǵý nemese ózge de zorlyq-zombylyq áreketteri arqyly fızıkalyq jáne psıhıkalyq qınaý faktisi boıynsha aıyp taǵylyp otyr.
Іs elordanyń Qylmystyq ister jónindegi mamandandyrylǵan aýdanaralyq sotynda qaralyp jatyr. Sýdıa — Aıjan Qulbaeva.
Aıta ketsek, aldyn ala tyńdaýǵa 80-ge jýyq BAQ ókili onlaın qatysyp otyr.
Eske salaıyq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy.
Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Aıta ketsek, bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi.
Bıyl 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilengen edi.
