Qýandyq Bıshimbaev marqum áıelimen nekesin tirkemegen – prokýror
ASTANA. KAZINFORM – Burynǵy Ulttyq ekonomıka mınıstri Qýandyq Bıshimbaev qaıtys bolǵan Saltanat Núkenovamen nekesin resmı tirkemegen. Bul týraly prokýror Aıjan Aımaǵanova málim etti.
«2022 jylǵy 16 jeltoqsanda Qýandyq Bıshimbaev pen Saltanat Núkenovanyń toıy ótti. Biraq, olar nekesin resmı tirkemegen. Olar azamattyq nekede bolǵan», - dedi Aıjan Aımaǵanova kúdiktige qatysty aıyptaýlardy oqı otyryp.
Odan bólek, kúdikti azamattyq nekedegi áıeliniń uıaly telefonyn baqylap, qońyraýlar men habarlamalardy tekserip otyrǵan. Sondaı-aq, aıyptaýshynyń aıtýynsha, kúdikti S. Núkenovany 2023 jylǵy naýryzdan bastap júıeli túrde uryp soqqan. Kúdikti Q. Bıshimbaev pen S. Núkenova arasyndaǵy urys-keris meıramhanaǵa barmaı turyp bastalǵan.
Buǵan deıin habarlaǵanymyzdaı, búgin Astanada Qýandyq Bıshimbaevtyń isi boıynsha aldyn ala tyńdaý ótip jatyr. Oǵan QR Qylmystyq kodeksiniń 99-baby 2-bóligi 5-tarmaǵy boıynsha adam óltirý, qasaqana, asa qatygezdikpen adam óltirý, Qylmystyq kodekstiń 110-baby 2-bóligi 1-tarmaǵy boıynsha materıaldyq jaǵynan táýeldi adamdy júıeli túrde uryp-soǵý nemese ózge de zorlyq-zombylyq áreketteri arqyly fızıkalyq jáne psıhıkalyq qınaý faktisi boıynsha aıyp taǵylyp otyr.
Іs elordanyń Qylmystyq ister jónindegi mamandandyrylǵan aýdanaralyq sotynda qaralyp jatyr. Sýdıa — Aıjan Qulbaeva.
Aıta ketsek, aldyn ala tyńdaýǵa 80-ge jýyq BAQ ókili onlaın qatysyp otyr.
Eske salsaq, 2023 jyly 9 qarashada Astanadaǵy «Bau» meıramhanasynda burynǵy Ulttyq ekonomıka mınıstri Qýandyq Bıshimbaev óziniń jubaıyn soqqyǵa jyqty. Áıel jedel járdem jetkenshe kóz jumdy.
Munan soń Іshki ister mınıstrligi Qýandyq Bıshimbaevtyń ustalǵanyn rastady.
Ótken jyly 15 qarashada ótken keńeste Memleket basshysy Qasym-Jomart Toqaev Іshki ister mınıstrine Q. Bıshimbaevtiń isin erekshe baqylaýǵa alýdy tapsyrdy.
Aıta ketsek, bıyl 11 qańtarda elorda soty Qýandyq Bıshimbaevty kúzetpen ustaý merzimin 2 aıǵa uzartqan edi.
Bıyl 26 aqpanda Qýandyq Bıshimbaevtyń isi sotqa tústi.
1 naýryzda Qýandyq Bıshimbaevtyń isi boıynsha aldyn ala tyńdaý kúni belgilengen edi.
