Kýala-Lýmpýrda Qazaqstan-Malaızııa Іskerlik keńesiniń keńsesi ashyldy
NUR-SULTAN. QazAqparat - Qazaqstannyń Malaızııadaǵy Elshiliginiń qoldaýymen Kýala-Lýmpýrda Qazaqstan-Malaızııa Іskerlik keńesi keńsesiniń resmı ashylýy ótti. Іs-sharaǵa eki eldiń memlekettik organdarynyń, damý ınstıtýttarynyń, ulttyq jáne jeke kompanııalardyń basshylary qatysty, dep habarlaıdy QR SІM baspasóz qyzmeti.
Keńes músheleri Qazaqstan men Malaızııanyń iskerlik múmkindikteri týraly óz tájirıbelerimen bólisip, bızneske qoldaý kórsetý, ınvestıtsııalardy qorǵaý jáne otandyq jáne sheteldik kompanııalar úshin teń jaǵdaılardy qamtamasyz etý úshin qarjy quraldaryn jetildirýge baǵyttalǵan Qazaqstannyń saıasatyna erekshe nazar aýdardy.
Malaızııadaǵy Qazaqstan Elshisi Bolta Imanbaev is-shara qatysýshylaryn qarsy ala otyryp Kýala-Lýmpýr Qazaqstannyń Ońtústik Shyǵys Azııadaǵy negizgi saýda áriptesi ekenin atap ótti. 2018 jyldyń qorytyndysy boıynsha, qos memleket arasyndaǵy saýda sattyq 4 ese ósip 500 mln. AQSh doll. shamasyn quraǵan. Sondaı-aq, qazirgi tańda, Qazaqstanda malaızııalyq kompanııalarmen jáne ınvestorlarmen birlestikte munaı-gaz, aýylsharýashylyq jáne qurylys salalarynda jalpy quny 1 mlrd. AQSh doll. teń jobalar júzege asyrylyp jatqany týraly habardar etti
.
Sonymen qatar, B.Imanbaev Qazaqstan tarapy ıslamdyq qarjylandyrý, halal ındýstrııa, elektrondyq kommertsııa, týrızm, densaýlyq saqtaý, aqparattyq qaýipsizdik tárizdi basym baǵyttar boıynsha ekijaqty áriptestikti nyǵaıtýǵa múddeli ekendigin jetkizdi.
Sonymen qatar, QMІK-niń teń tóraǵalary Datýk Lý Djı men Dato Berikqazy Seksenbaev ıslamdyq qarjylandyrý, halal ındýstrııa, elektrondy kommertsııa, týrızm, densaýlyq saqtaý, aqparattyq qaýipsizdik sııaqty perspektıvaly baǵyttar boıynsha ekijaqty yntymaqtastyqty tereńdetýge qyzyǵýshylyq tanytty. Olardyń pikirinshe, Іskerlik keńes ekijaqty saýda-ekonomıkalyq jáne ınvestıtsııalyq yntymaqtastyqtyń keshenindi suhbat júrgizetin jáne eki eldiń isker toptary arasyndaǵy baılanystardy jandandyratyn tıimdi alań bolyp tabylady.
QMІK músheleriniń jumys kezdesýi aıaqtalǵannan keıin eki eldiń isker toptary ınvestıtsııalyq jáne saýda-ekonomıkalyq yqpaldastyqty odan ári nyǵaıtýǵa ýaǵdalasty.
