Kýala-Lýmpýrda HOK sessııasy ashylady, onda Olımpıada-2022 astanasy tańdalady
ASTANA. QazAqparat - Halyqaralyq Olımpıada komıtetiniń (HOK) kezekti 128-shi sessııasy beısenbi kúni Malaızııa astanasy - Kýala-Lýmpýrda ashylady. Onyń basty oqıǵasy 2022 jylǵy qysqy Olımpıada oıyndarynyń astanasyn tańdaý bolmaq, ony ótkizýge Almaty men Beıjiń úmitker bolyp otyr. Úmitkerlerge daýys berý 31 shildede ótedi, dep habarlady TASS.
Qazirgi kezde daýys berý quqyǵyna uıym múshesi bolyp otyrǵan 105 adamnyń haqysy bar. Kýala-Lýmpýrda olar sondaı-aq 2020 jylǵy qysqy jasóspirimder Olımpıadalyq oıyndarynyń astanasyn tańdaıdy - oǵan shveıtsarııalyq Lozanna men rýmyndyq Brashova úmitker bolyp otyr. Budan basqa, aldaǵy sessııadaǵy qaralatyn mańyzdy máselelerdiń biri Monakoda jeltoqsanda qabyldanǵan Olımpıadalyq qozǵalysty damytý strategııasyn («Kún tártibi»-2020) júzege asyrýdy baǵalaý bolmaq.
128-shi sessııanyń ashylýy beısenbide ótedi, alaıda HOK músheleri óz jumysyn kelesi kúni bastaıdy. Sessııanyń kún tártibine sondaı-aq 2018 jylǵy qysqy Olımpıada oıyndarynyń baǵdarlamasyna engiziletin ózgerister boıynsha daýys berý de engizilgen. 2 tamyzda sessııada Ońtústik Sýdandy olımpıadalyq qozǵalystyń tolyqqandy múshesi etip taný týraly daýys berý ótedi, ol búginde azamattyq soǵys júrip jatqan osy eldiń 2016 jyly Olımpıadalyq oıyndarǵa qosylýyna múmkindik beredi. HOK 128-shi sessııasy 3 tamyzǵa deıin sozylady. Al onyń kelesi sessııasy 2016 jylǵy shildede Rıo-de-Janeıroda Olımpıadalyq oıyndar qarsańynda ótpek.
