Sherzattyń dostary da taıaq jegen: beınejazbada taǵy ne aıtyldy

TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr. 

Basty sot otyrysynda kámeletke tolmaǵan kýáger Aldııar Mahmettiń Qonaev qalasynda bolǵan jabyq sot kezindegi beınejazbasy qosyldy.

Ol 3 qazan kúni aǵasy Ahmet Mahmetpen jáne ózge dostarymen birge bılıardqa barǵanyn atap ótedi. Aıtýynsha, bılıardta bolǵan kezde Ahmetke Sherzat qońyraý shalyp, kómekke shaqyrǵan. Olar taksıge otyrǵanda Sherzat qaıta habarlasyp, bári sheshilgenin aıtqan.

— Biz taksıge mingennen keıin bara salaıyq dedik. «Qamajaı» dúkeni aldynan tústik. Onda Nurqanat aǵa, Qarjaýbaı aǵa jáne 3 jigit turdy. Shette turǵanbyz, sol kezde Hyundai Accent kóligi keldi. Odan 3 jigit tústi, iship alǵan. Qoldarynda syra bar. Bizge keldi de «bári sheshilip jatyr ma» dep surady. «Iá» dep jaýap berdik. Nurqanat aǵa 5 metr jerde basqa kisimen sóılesip turǵan. Myna jaqtan Mercedes avtokóligi keldi. Іshinen 5 erkek jáne 2 áıel tústi. Er adamdar bizge keldi. Іshinde Abzal degen meniń aǵamnan «qaısyń meniń baýyrymdy urǵan» dep surady. Aǵam «biz emes, áni aǵasy tur, sóıles» degen kezde ony Abzal urady. Aǵam talyp qaldy, basyn qabyrǵaǵa soǵyp, jaryp alady. Mıras degen balany bireý urady, biraq oǵan tımeı qalady. Men «eı» deımin, sol kezde bireý pyshaq shyǵarady da «ne boldy, baýyrym» deıdi. Myna jaqta Nurqanat aǵa kelip Ahmetti kóterip aldy. Men aǵamdy qolynan ustap artqa júrdik. Nurqanat biz jaqqa kele jatqan, ony Abzal 3 ret urdy. Ol qulap qaldy, ony tepkileı bastady. Men taǵy «e» dep aıqaladym. Sonda 3 erkek pyshaq shyǵardy da artymyzdan qýalady. Sonymen 350 metrdeı jerge qashtyq, — deıdi ol beınejazbada.

Sonymen qatar prokýror suraǵyna jaýap bergen kýáger kúdiktilerden qalaı qashqanyn naqtylap ótti.

— Biz tómenge túsken soń úsh erkek pyshaqpen turǵan, solar artymyzdan qýalap ketti. Biz qashyp qutyldyq. 50 metrdeı artymyzdan qýdy, — dedi ol.

Búgin sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi.

Sonymen qatar oqıǵa ornyna alǵash barǵan polıtseıler kýálik berdi.

Keshe sot otyrysynda kýáger Elmıra Nurbekova jaýap berdi.

Odan keıin ekinshi kýáger qyz Dana Jaqsygeldi oqıǵa týraly baıandady.

Buǵan deıin sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.

Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.

Eske salaıyq, prokýror oqıǵanyń tolyq hronologııasyn baıandady.

Aıyptalýshylardyń kópshiligi kináni moıyndaǵan joq.

Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

2024 jyldyń jeltoqsan aıynda Talǵar mańynda Sherzat Polattyń aǵasynyń denesi tabyldy. 

Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.