Kýágerler «Fenıkstiń» túsirilimi kezinde jalǵan qoldar qoıylǵanyn aıtty
ALMATY. QazAqparat - Búgin Almaty qalasyndaǵy №2 Medeý aýdandyq sotynda «Fenıks» kınofılmin túsirýge bólingen qarajatty jymqyrý faktisi boıynsha «Sh. Aımanov atyndaǵy «Qazaqfılm» AQ-nyń laýazymdy tulǵalaryna jáne «T.K. Turan Universal Business» JShS-niń qyzmetkerlerine qatysty sot otyrysy odan ári jalǵasty. Sotta sóılegen kýágerler «Fenıkske» qatysty birqatar bylyqtardy rastady.
Sotqa túsinik bergen kýáger Raýshan Mahno ózin kınofılmge rejısserdiń assıstenti retinde onyń kúıeýiniń ápkesi Natalıa ıÝdına jumysqa shaqyrǵanyn áńgimeledi. «Men 2014 jyldyń jeltoqsanynan 2015 jyldyń sáýirine deıin aı saıyn 140 myń teńge alyp, N. ıÝdınaǵa berip otyrdym. Aqsha meniń «TsentrKredıtbankten» alǵan kartochkama tústi»,- dedi kýáger. Alaıda ol kınofılm túsirýge eshqandaı jumysqa qatyspaǵanyn ashyq aıtty.
Búgin sotqa jaýap bergen taǵy bir kýáger - Qazbek Ámirjanov eski tanysy Jánibekovtiń ótinishi boıynsha «Fenıks» kınotýyndysyn túsirýge qatysady. Stsenarıı bekitilgen soń ol «Sh. Aımanov atyndaǵy «Qazaqfılm» AQ-men avtorlyq kelisimshartqa qol qoıady.
Keıinirek Ámirjanov kınofılmniń aldyn-ala daıyndyq sharalaryna, sondaı-aq ashyq ǵaryshtaǵy sahna kórinisine qatysady. Kelisimshartqa sáıkes, ol óz jumysyna 2 mln-ǵa jýyq teńge qalamaqy alý kerek bolǵan. Alaıda qoıýshy-operatorǵa is júzinde tek 800 myńǵa jýyq teńge tólenipti. Aqshany «Qazaqfılm» AQ tólegen kórinedi.
Ol sot otyrysynda esep-qısap qujattarynyń zańsyz jolmen jasalǵanyn áshkereledi. Tergeý barysynda oǵan óziniń jáne fırmanyń atynan jasalǵan esep-qısap qujattaryn kórsetkende kezde, ol jerde óz qolynyń jalǵan ekenin jasyrmady. Sóıtip, 800 myń teńgege kórsetilgen qyzmet túrleri jasalǵan kelisimshart, atqarylǵan jumystardyń aktisi jalǵan bolyp shyqty. Ol «T.K. Turan Universal Business» JShS-inen eshqandaı aqsha almaǵanyn aıtyp, istiń aq-qarasyn ajyratyp berdi.
«T.K. Turan Universal Business» JShS-niń burynǵy dırektory Erjan Ábdrahmanov ta sotta «Fenıkske» qatysty birneshe bylyqtyń betin ashty. Atap aıtqanda, kelisimsharttarǵa onyń qolyn syrtynan bireýler qoıyp otyrǵan. «Meniń qolymdy keıbir qujattarǵa ózderi qoıypty. Ol jerdegi qolymnyń ózimdiki emestigin aıtyp, saraptamaǵa berdim»,- dedi ol sottaǵy jaýabynda.
«Men 2012 jyldyń kúzinde ortaq tanysymnyń kómegimen «T.K. Turan Universal Business» JShS-niń dırektory bolyp ornalastym. Alaıda, atalǵan fırmanyń quryltaıshysy Tuńǵyshbaı Jamanqulov meniń fırmada formaldy túrde qyzmet isteıtinimdi túsindirdi. 2012 jyldyń sońynda T. Jamanqulovpen arada áńgimede ol maǵan «Fenıks» atty fantastıkalyq fılm túsirýge daıyndyq júrip jatqanyn jetkizdi. Keıinirek, 2013 jyly jazda «T.K. Turan Universal Business» JShS-niń keńsesinde Tuńǵyshbaı Jamanqulov jáne Talǵat Jánibekov úsheýmiz fılmniń stsenarııin talqyladyq»,- dep áńgimeledi kýáger.
Al 2014 jyldyń sáýirinen bastap T. Jamanqulov pen T. Jánibekov oǵan fırmanyń qyzmetine qatysty kóptegen qujattarǵa qol qoıýyn ótinedi. «Men Tuńǵyshbaı Qadyruly aıtqan soń sol qujattarǵa qol qoıdym»,-dedi ol. Alaıda, ol «Fenıksti» túsirý jumystaryna qatyspaǵandyqtan basqa esep-qısaptyq jáne jumys qujattaryna qolyn qoımaǵan. E. Ábdirahmanovtyń qolyn bógde bireýler qoıyp otyrǵan.
Ámirlan Álimjan
