Kýágerler Almatyda avtobýstyń qalaı apatqa ushyraǵanyn aıtty
ALMATY. KAZINFORM – Almatyda avtobýs jeńil kólikpen soqtyǵysyp, saldarynan 1 adam mert boldy jáne 25 jolaýshy zardap shekti. Kazinform tilshisi oqıǵa ornyna baryp, qazirgi mán-jaımen tanysyp qaıtty.
Jol-kólik oqıǵasy kezinde jumys ornynda bolǵan Ásem Sarǵalıeva avtobýs apaty bolǵan kezde jedel járdem shaqyrǵanyn aıtady.
Onyń sózinshe, jol qıylysynan buryla bergen jeńil kólikke avtobýs soǵylǵan.
- Men apat bolǵan jerge qarama-qarsy ǵımarattyń birinshi qabatynda jumys isteımin. Búgin jumysta otyrǵanymda birinshi kóliktiń burylǵanyn kórdim. Oǵan kelip avtobýs soǵyldy. Dalaǵa shyqqanymda jolaýshylar avtobýstyń terezesin syndyryp shyǵyp jatty. Adamdar kómekke shaqyryp, aıqaılaǵanyn estigenimde birden jedel járdemge habarlastym. Sosyn áriptesterim avtobýstan adamdardy shyǵarýǵa kómektesti. Keı adamdardyń qol-aıaqtary qanaǵan boldy, keıbiriniń aıaǵy synǵan. Olardy jedel járdem kóligi alyp ketti. Jedel járdem brıgadasy jyldam, nebári 5 mınýtta keldi. Al polıtsııa 8-9 mınýt ótkende kelgenin kórdim, - dedi ol.
Sondaı-aq Ásem Sarǵalıeva qaıtys bolǵan azamat oqıǵa kezinde dúkennen shyǵyp kele jatqanyn aıtty.
- Meniń estýimshe jáne baıqaǵanym boıynsha, ol kisi dúkennen shyǵyp kele jatqan. Sol kezde ony avtobýs basyp ketken, - dedi kýáger.
Eske salaıyq, Almatyda 18-shi baǵyttaǵy avtobýs apatqa ushyrap, bir adam qaza tapty.
Almaty qalasynyń Densaýlyq saqtaý basqarmasy avtobýstyń ishinde bolǵan jolaýshylardyń 25-i zardap shekkenin málimdedi.
