Kýágerden kúdiktige aınalǵan aqtóbelik ashtyq jarııalady
AQTÓBE. QazAqparat - Aqtóbede túngi klýbtan shyǵyp, jappaı tóbeleskenderdi toqtatpaq bolǵan Baýyrjan Ýnerzak eki aı boıy tergeý ızolıatoryna qamalǵan. Ol denesine tergeýshiniń aty-jónin oıyp jazyp, ashtyq jarııalaǵan. Sot tergeý aıaqtalǵansha ony úıqamaqta ustaýǵa sheshim shyǵardy, dep habarlaıdy QazAqparat tilshisi.
Aqtóbe qalasynyń 29 jastaǵy turǵyny Baýyrjan Ýnerzak qazir páterinen bir qadam uzaı almaıdy. Ol túngi klýbta bolǵan jappaı tóbeles kezinde basý aıtyp, sabyrǵa shaqyrǵany úshin kýágerden kúdiktige aınalǵan.
«Kúıeýim Baýyrjan Ýnerzak túngi klýbtan shyǵyp, tóbelesti kóredi. Oraza aıynyń sońǵy kúninde sabyrǵa shaqyryp, arasha túsken. Bul oqıǵada ol úshinshi jaq, kýáger edi. Bári ótti, biraq eki kúnnen soń kúıeýimniń izdeýde júrgeni týraly habarlama keldi. Keıin habarlamany kúıeýim Baýyrjan Ýnerzakqa aıtyp, qorǵaýshymen habarlastyq. Qorǵaýshymyz tergeýshige habarlasyp, kýágerdiń kúdiktige aınalý sebebin surady. Oqıǵa 25 maýsymda boldy, polıtsııa qyzmetkerleri bizge 5 shilde kúni telefon shaldy. Keıin ІІD aparyp, sol jerden shyǵarmady, kýágerden kúdiktige aınaldy»,- dedi Arına Nuǵmanova.
№2 qalalyq sottyń sýdıasy Temirjan Aldanov óziniń denesine tergeýshiniń tegin oıyp jazǵan Baýyrjan Ýnerzakty úıqamaqqa aýystyrýǵa sheshim qabyldady. Ýaqytsha tergeý ızolıatorynda ashtyq jarııalap, óz denesin zaqymdaǵan ol úıine oralǵan soń jedel járdemniń kómegine júgingen.
«Bizdiń eki balamyz bar. Ashtyq jarııalap, denesine tańba salǵan kezde qoryqtym, aıadym. Ol budan basqa sheshimin tappaǵanyn aıtty. Sondyqtan prokýratýraǵa aryz jazyp, kómek suradym. Onyń jaǵdaıy jaqsy. Alǵash úıge kelgende úsh kún boıy tamaq ishe almady. As qorytý júıesi buzylǵan»,- dedi Arına Nuǵmanova.
Aıta keteıik, qazir osy isti Aqtóbe oblystyq prokýratýrasy óz baqylaýyna aldy.
«Qylmystyq kodekstiń «Buzaqylyq» baby boıynsha qozǵalǵan iske baılanysty Baýyrjan Ýnerzaktyń aryzy Aqtóbe oblysy prokýratýrasynyń baqylaýyna alyndy. Mán-jaıdy anyqtap, qosymsha habarlaımyz»,- dedi Aqtóbe oblysy prokýratýrasynyń apparat jetekshisi Jasulan Dáýlembaev.
