Kýáger Jamanqulovqa arnalǵan qarajatty qolma-qol aqshaǵa aınaldyrylǵany týraly egjeı-tegjeıli áńgimeledi
ALMATY. QazAqparat - Almaty qalasyndaǵy №2 Medeý aýdandyq sotynda rejısser Tuńǵyshbaı Jamanqulovqa qatysty qylmystyq is qaralýda. Tergeýden belgili bolǵanyndaı, Tuńǵyshbaı Jamanqulovqa «Fenıks» kınofılmin túsirýge bólingen qarajattyń 69 mln. teńgesin jymqyrdy degen aıyp taǵyldy.
Sottyń búgingi otyrysynda osy is boıynsha «T.K. TURAN UNIVERSAL BISINESS» JShS-niń esepshisi Nazgúl Júnisova túsinik berdi. «2014 jyldyń mamyr aıynda Tuńǵyshbaı Jamanqulov «Fenıks» kınofılmin túsirý úshin meni «T.K. TURAN UNIVERSAL BISINESS» JShS-niń esepshisi retinde jumysqa shaqyrdy. Birinshi transh - 10,5 mln. teńge 2014 jyldyń mamyr aıynda jiberildi. Osy somanyń 8,3 mln. teńgesi stsenarıstiń esep-shotyna aýdaryldy. Fılmniń óndirisine aqsha 2014 jyly 15 mamyrda tústi»,- dep áńgimeledi kýáger.
Onyń aıtýynsha, Tuńǵyshbaı Jamanqulov «Fenıks» kınofılminiń túsirý tobymen turaqty túrde jınalys ótkizgen. Sol jınalystarda jumys reti talqylanǵan, sondaı-aq T. Jamanqulov túsirýshiler tobyna tapsyrma berip otyrǵan. «2014 jyly maýsym aıyndaǵy basqosýda Tuńǵyshbaı Jamanqulov ózine 6-7 mln. teńge aqsha qajettigin aıtty. Men ol somanyń naqty qansha ekenin esimde saqtamadym. Ol «Fenıks» fılminiń atqarýshy prodıýseri Natalıa ıÝdınaǵa aqsha jınaýǵa tapsyrma berdi. Bir apta ýaqyt ótken soń Natalıa ıÝdına telefon shalyp, maǵan esep-shottan 717 myń teńgeni alýdy ótindi. Óıtkeni, oǵan osy kólemdegi soma jetpegen. Al aqshany men Kerimjan Esbaevtyń («Fenıks» kınokartınasynyń dırektory - avtor.)kózinshe seıfke saldym»,- dedi Nazgúl Júnisova sottaǵy sózinde.
Sondaı-aq, kýáger arada biraz ýaqyt ótkende seıfte 5,2 mln. teńge jınalǵanyn áńgimeledi. Bul aqsha Tuńǵyshbaı Jamanqulovqa berilgen. «2015 jyly qańtar aıynda men fırmanyń esep-shotynan qalǵan soma - 1,7 mln. teńgeni alyp, keńsedegi shkafqa saldym. Alaıda, aqshany sol kúıinde umyt qaldyryppyn. Keıin tergeý barysynda ol aqshanyń qalǵany esime túsip, qaıta alyp, «T.K. TURAN UNIVERSAL BISINESS» JShS-niń esep-shotyna saldym»,- dep túıindedi sózin kýáger.
Buǵan qosa, N. Júnisova «Fenıks» fılmin túsirýge qatysty basqa da qarjylyq bylyqtar týraly áńgimeledi. «Meniń bilýimshe, kartınanyń rejısseri Talǵat Jánibekovke jáne redaktory Ǵızat Sultanovqa qosymsha aqy tólendi. «Fenıkske» tartylǵan áleýetti jetkizýshiler men qyzmet túrlerin usynýshylardan túsken qarajat birden qolma-qol aqshaǵa aınaldyrylyp otyrdy»,- dedi ol.
Aıta ketelik, tergeý barysynda Tuńǵyshbaı Jamanqulov óziniń qorǵaýshysynyń kózinshe bıýdjet qarajatyn urlaǵanyn tolyq moıyndady.
Sondaı-aq, jymqyrylǵan aqshany qolma-qol aqshaǵa aınaldyryp, óziniń jeke qajettilikterin qanaǵattandyrýǵa jumsalǵanyn aıtty.Tergeý nátıjesinde belgili bolǵany, «Fenıks» kınofılminiń alǵashqy jáne daıyndyq kezeńderiniń óndirisine dep «T.K. Turan Universal Business» JShS-ine 79 mln. teńge aýdarady. Sonyń ishindegi 69 mln. teńgesin joǵaryda aty atalǵan kompanııa arqyly kınokartınanyń bas prodıýseri Tuńǵyshbaı Jamanqulov urlaǵan. Atalǵan kompanııanyń quryltaıshysy da - T. Jamanqulov. Aqsha qosalqy merdigerlik uıymdar arqyly qolma-qol aqshaǵa aınaldyrylyp, keıinirek T. Jamanqulovqa jetkizilgen.
Ámirlan Álimjan
