Kýáger ıÝlııa Isakova: Tenderdi «Ulttyq baspasóz klýbyna» utqyzýǵa tapsyrma berildi
ASTANA. QazAqparat - Aǵymdaǵy jyldyń 29 tamyzynda Astana qalasyndaǵy №2 Esil aýdandyq sotynda Qazaqstan jýrnalıster odaǵynyń tóraǵasy Seıitqazy Mataev jáne uly Áset Mataevtyń qylmystyq isi boıynsha sot otyrysy odan ári jalǵasty.
Aıta ketelik, olarǵa «alaıaqtyq jasady jáne salyqtan jaltardy» degen aıyptar taǵylyp otyr. «Qazaqtelekom» AQ-na qatysty epızod boıynsha sotqa jaýap bergen «Qazaqtelekom» AQ-nyń buqaramen baılanys jónindegi qyzmetiniń burynǵy jetekshisi ıÝlııa Isakova tenderlerdiń zańsyz bólingeni, Seıitqazy Mataevtyń ıeligindegi «Ulttyq baspasóz klýby» qoǵamdyq birlestigine artyqshylyq berilgeni jóninde áńgimelep berdi.
Buǵan deıingi kýágerlerdiń túsiniginen belgili bolǵanyndaı, S. Mataev óziniń jeke basynyń bedelin paıdalana otyryp, «Qazaqtelekom» AQ-nyń strategııalyq basqarý jónindegi bas dırektory Batyr Mahanbetajıevke tenderdi utyp alýǵa kómektesýge ótinish jasaıdy. Óz kezeginde S. Mataev jarnamalyq-aqparattyq materıaldardy BAQ-tarda ornalastyrý boıynsha gazetter men kompanııanyń arasyndaǵy deldal rólin atqarady.
«Buqaramen baılanys jónindegi qyzmetke tikeleı jáne jalǵyz Batyr Mahanbetajıev basshylyq etti. 2011-2012 jyldary B. Mahanbetajıev maǵan tender ótkizýde «Ulttyq baspasóz klýbyna» barynsha basymdyq berip, utqyzýdy tapsyrdy. Sol sebepten men menedjerler Z. Qazybaeva men M. Ýálıhanǵa shartta baspa BAQ-tardyń praıs-paraqshasyndaǵy baǵany emes, áleýetti jetkizýshi - «Ulttyq baspasóz klýbynyń» tenderlik qujattarynda kórsetilgen baǵany belgileýdi usyndym. Ondaǵy baǵa basqa baspa BAQ-dikinen joǵary bolatyn» dedi ol sot otyrysynda.
Atap aıtarlyǵy, memlekettik satyp alý tenderin ótkizýde baǵa máselesine erekshe kóńil bólinedi. Óıtkeni bul shara tenderlik qujattardyń ajyramas bir bóligi bolyp tabylady. Sondaı-aq, kórsetiletin qyzmettiń baǵasy negizgi faktor bolyp sanalady.
Buǵan qosa, ıÝ. Isakova S. Mataevtyń týysy ári kómekshisi, «Ulttyq baspasóz klýbynyń» ókili Erlan Ramazanovqa kómekteskenin jasyrmaı aıtyp berdi. Ol kompanııa menedjerlerine «Ulttyq baspasóz klýbynyń» tenderdik qujattaryn jaqsylap qarap, jekelegen kemshilikterin joıýǵa tapsyrma berip otyrǵan. Sondaı-aq, E. Ramazanovty tender ótpeı turyp, tenderlik qujattarmen jáne «Qazaqtelekomnyń» bıýdjetimen tanystyrǵan. Sonyń nátıjesinde 2011-2012 jyldary tender ótkizilmegen bolyp sanalyp, sonyń nátıjesinde ol Qazybaeva men Ýálıhanǵa qaıta tender ótkizbeı-aq, «Ulttyq baspasóz klýbymen» «bir kózden» qarjylandyrýǵa shart jasaýdy tapsyrady. Mundaı norma memlekettik satyp alý tártibine qaıshy kelmeıtin edi.
ıÝ. Isakova da baspa BAQ-tarda jaryqqa shyqqan materıaldarǵa tekserý júrgizbeı-aq, «Ulttyq baspasóz klýby» jibergen atqarylǵan jumystar týraly aktilerge qolyn qoıǵan. Onyń nusqaýymen jumys istegen menedjerler sharttar jasalmaı turyp-aq, «Qazaqtelekomnyń» qyzmeti týraly materıaldardy baspa BAQ-tarǵa ózderi ornalastyrǵan. Ol sot aldyndaǵy bergen jaýabynda B. Mahanbetajıevtiń tapsyrmalaryn jumystan bosata ma degen qorqynyshpen oryndaǵanyn aıtty. Eske sala ketsek, tergeýdiń nusqasy boıynsha S. Mataev «Qazaqtelekom» AQ-nyń 143 mln. teńgesin urlady dep aıyptalyp otyr.
