Kýáger: «Tenderler ótkizgende, Mataevqa basymdyq berildi»
ASTANA. QazAqparat - Seıitqazy Mataev pen onyń uly Áset Mataevtyń isi boıynsha sot talqylaýy aıasynda «Qazaqtelekom» AQ Qoǵammen baılanys qyzmetiniń burynǵy jetekshisi ıÝlııa Isakova tenderlerdiń zańsyz ótkenin, S.Mataevqa tıesili «Ulttyq baspasóz ortalyǵy» qoǵamdyq birlestigine basymdyq berilgenin aıtty.
Buǵan deıin kýágerler túsiniktemesi arqyly Seıitqazy Mataevtyń óz bedelin paıdalanyp, «Qazaqtelekom» AQ strategııalyq basqarý boıynsha bas dırektory Batyr Mahanbetájıevke barǵany, kompanııa qyzmetin jarııalaý boıynsha tenderdi jeńip alýǵa kómek suraǵany belgili bolǵan edi. Óz kezeginde S.Mataev jarnamalyq materıaldardy jarııalaýda kompanııa men gazetter arasynda deldal bolǵan.
«Batyr Mahanbetájıev maǵan baspasózde materıaldar jarııalaý boıynsha ótken tenderde «Ulttyq baspasóz ortalyǵy» qoǵamdyq birlestiginiń jeńip shyǵýyna barynsha kómektesý týraly tapsyrma berdi», - dedi ıÝlııa Isakova.
Odan bólek, kýáger sotqa atqarylǵan jumystar aktilerin teksermegenin, basshysy Batyr Mahanbetájıevtiń S.Mataev esepterine «kóz juma» qaraýdy buıyrǵanyn aıtty.
Jáne kompanııa qyzmetkerleri «Qazaqtelekom» AQ qyzmeti týraly materıaldar jarııalaýdy óz betimen, S.Mataevtyń qatysýynsyz júzege asyrǵan.
Tergeý boıynsha, Seıitqazy Mataev «Qazaqtelekom» AQ-nyń 143 mln teńge qarajatyn jymqyrǵan.
