Kýáger sotta S. Mataevtyń týystaryna qomaqty qarajat aýdarǵanyn rastady
ASTANA. QazAqparat - Astana qalasyndaǵy №2 Esil aýdandyq sotynda Seıitqazy jáne Áset Mataevtardyń isi boıynsha sot otyrysy odan ári jalǵasýda.
Sotqa shaqyrylǵan kýágerler «Salyq tóleýden jaltardy» degen ekinshi epızod boıynsha sotqa túsinik berýde.
«Men «Ulttyq baspasóz klýby» qoǵamdyq birlestiginde eshqashan jumys istegen joqpyn. Sol sebepten eńbek shartym da joq. Biraq jalaqymnyń ne sebepten «QazTAG»-tan emes, «Ulttyq baspasóz klýby» qoǵamdyq birlestiginen túsip otyrǵanyn bilmedim»,-delingen S. Mataevtyń kelini, «QazTAG» halyqaralyq aqparat agenttigi» JShS-de jazylym boıynsha menedjer bolyp jumys istegen Aıda Mataevanyń sotqa bergen jaýabynda. Búgingi sot otyrysyna kýáger qatysa almaǵandyqtan, onyń jaýabyn sýdıa Aqbolat Qurmantaev jarııa etti.
«2009 jyldan bastap Seıitqazy Mataevtyń usynysymen «QazTAG» HAA JShS-de jazylym boıynsha menedjer bolyp jumys istedim. Aı saıyn 150 myń teńge jalaqy aldym. Biraq «Qazaqstannyń Halyq banki» AQ-nan ashqan kartalyq shotyma jalaqym «QazTAG»tan emes, «Ulttyq baspasóz klýby» qoǵamdyq birlestiginen túsip otyrdy. Nelikten bulaı bolǵanyn bilmeımin. Óıtkeni, «Ulttyq baspasóz klýbynda» eshqashan jumys istegen joqpyn. Múshelikke ótpegendikten eshqashan múshelik jarna tólegen emespin. Alaıda is júzinde qoǵamdyq birlestiktiń ıesi S. Mataev ekenin bildim», -delingen kýágerdiń sotqa bergen túsiniginde.
Bankten alynǵan qujatqa sáıkes, Aıda Mataevanyń kartalyq shotyna 2011 jyly 1 mln 903 myń teńge, 2012 jyly 1 mln 217 teńge aýdarylǵan. Ol bul aqshany dúkenderden kıim satyp alýǵa jáne basqa da jeke qajettilikterine jumsaǵan. Mysaly, bir joly dúkenge 446 myń 426 teńge, endigi bir joly 111 myń 260 teńge jumsaǵanyn rastady. Eske sala ketsek, aldyńǵy sot otyrysynda aýdıtorlyq tekseristiń nátıjesinde Seıitqazy Mataevtyń «Ulttyq baspasóz klýby» qoǵamdyq birlestiginiń esebinen 269 mln. astam teńge bólip, óziniń týystary men qyzmetkerleriniń dúkender men meıramhanalardaǵy shyǵyndaryna demeýshilik jasaǵany aıtyldy.
Aýdıtor Evgenıı ıÝnýsov bıznes-aýdıttik tekseristiń nátıjesinde 2005 jyldyń 1-inshi qańtarynan 2016 jyldyń 25-inshi aqpanyna deıingi aralyqta bankten jalpy somasy 606 mln. 809 myń 785 teńge alynǵanyn, sonyń ishinde Seıitqazy Mataevtyń túbirtek kitapshasynan 474 mln 369 myń 155 teńge alynǵanyn aıtqan bolatyn. Al keshegi otyrysta sotqa túsinik bergen «Sberbank» AQ-nyń Almaty qalasyndaǵy menedjerleri «Ulttyq baspasóz klýby» qoǵamdyq birlestiginiń shotynan aqshany jalǵyz Seıitqazy Mataevtyń alyp kelgenin rastady.
Atap aıtarlyǵy, bankten alynǵan iri kólemdegi qarajattyń qolma-qol aqshaǵa aınaldyrylǵanyn Astanadaǵy sot saraptamasy ortalyq ınstıtýtynyń sarapshysy Baýyrjan Rysqalıev te rastady. Onyń esebine sáıkes, 2010-2015 jyldary Baılanys, aqparattandyrý jáne aqparat komıteti men «QazTAG» halyqaralyq aqparat agenttigi» JShS-gi memlekettik saıasatty aqparattyq jaryqtandyrýǵa jalpy somasy 169 mln. teńgege shart jasaıdy. Saraptamanyń nátıjesinde belgili bolǵandaı, 2010-2015 jyldary Seıitqazy Mataev 474 mln 369 myń 155 teńgeni qolma-qol aqshaǵa aınaldyrǵan. Sonyń ishindegi 55 mln. teńgesi memlekettik aqparattyq tapsyrys aıasynda aýdarylǵan qarajat ekeni anyqtaldy.
