Kýáger sotta BQO-da MI-8 tikushaǵynyń qalaı qulaǵany jóninde aıtyp berdi
ORAL. KAZINFORM — Batys Qazaqstan oblysy Báıterek aýdandyq № 2 sotynda MI-8 tikushaǵynyń apatqa ushyraýyna baılanysty qylmystyq isti qaraý jalǵasyp jatyr.
Sotta málim bolǵanyndaı, apat kezinde qaza tapqan áýe kemesiniń komandıri, 59 jastaǵy Dáýletbaı Qanatov pen 50 jastaǵy ekinshi ushqysh Vladımır Afanasevke QR Qylmystyq kodeksiniń 344-babyna (temirjol, áýe, teńiz nemese ózen kóligi júrisi nemese olardy paıdalaný qaýipsizdigi qaǵıdalaryn buzý) sáıkes aıyp taǵylǵan.
Apat 2023 jyly 23 aqpanda Báıterek aýdany Beıbitshilik aýylynan alty shaqyrym qashyqtyqta oryn alǵan. Tikushaq «QazTransOıl» AQ-nyń tapsyrysy boıynsha kommertsııalyq reıs oryndaǵan. Apat saldarynan tórt ekıpaj múshesi mert bolyp, taǵy eki adam jaraqat alǵan.
Sýdıa Aleksandra Sıdorova qarap jatqan sot otyrysynda jaýap bergen kýágerlerdiń biri Nurbek Shakıshev tikushaq apatqa ushyraǵan kezde Kólik mınıstrliginiń áýe oqıǵalaryn tekserý boıynsha bas sarapshysy retinde komıssııa quramynda jumys istegen.
Onyń sózine qaraǵanda, komıssııa óz esebinde apat sebepterin atap kórsetken. Atap aıtqanda, jermen vızýaldyq baılanys joǵalǵan, keri oralý jóninde sheshim ýaqytyly qabyldanbaǵan, ushaq qaýipsiz bıikke shyǵa almaǵan jáne tómendeý týraly eskertý júıesi paıdalanylmaǵan.
Kýágerdiń málimdeýinshe, áýe komıssııasy kinálilerdi anyqtamaıdy, tek oqıǵanyń sebepterin aıqyndap, mundaı apattarǵa jol bermeý jóninde usynbalar beredi.
Bastapqyda reıs «QazTransOıl» AQ-nyń tapsyrysy boıynsha 2023 jylǵy 22 aqpanǵa josparlanǵan, alaıda aýa raıyna baılanysty keıinge qaldyrylǵan.
Tikushaq ushqan kezde aýa raıy nasharlaǵan. Ekıpaj jer nysandaryn kózben shola almaǵan, baǵanalarǵa qarap baǵyt ustaǵan. Baǵanalar kórinbeı qalǵan kezde ekıpaj keri burylý jóninde sheshim qabyldaǵan, áıtse de qaýipsiz bıikke kóterilýge ýaqyt jetpegen.
Komıssııa materıalynda ekıpajdyń is-áreketi buzýshylyq emes, qatelik retinde kórsetilgen. Áýe kemesiniń komandıri keri qaıtý jóninde sheshim qabyldaǵan, biraq muny ýaqytyly istemegen.
Sotta sonymen qatar ekıpaj músheleriniń apatqa 12 mınýt qalǵanǵa deıingi sátte ne dep sóıleskeni málim boldy. Ushqyshtar aýa raıynyń nasharlaǵany, búıirden kúshti jel turǵany jáne aldarynyń kózge durys kórinbeıtini týraly aıtqan. Talqylaý kezinde komandır bortmehanıkten tıisti núktege deıin ushýdy jalǵastyrý kerek pe dep suraǵan. Tapsyrys berýshiniń ókili de áńgimege aralasyp, keıin áýejaıǵa oralýdy usynǵan. Apatqa ushyramastan buryn komandır keri oralý týraly sheshim qabyldap, bıikke kóterilý qajettigi jóninde habarlaǵan.
N.Shakıshevtiń málimdeýinshe, apattan keıin komandır tiri bolǵan, ekıpajdyń bir múshesi arqyly ushaqtyń orny týraly málimet bergen. Biraq koordınattar qutqarýshylarǵa keshiktirilip jetkizilgen. Apatty radıomaıak jerge tikushaq soǵylǵan kezde jumys isteýi tıis. Alaıda qatty soqqy bolmaı, tikushaq janaı qulaǵandyqtan, maıak jumys istemegen. Qutqarýshylar da apat ornyna jetý kezinde qıyndyqqa kezikken, aýyr tehnıkanyń júrýi úshin traktor shaqyryp, joldy arshýǵa týra kelgen.
Sot otyrysynda kýágerlerden jaýap alý jalǵasady.
Eske sala keteıik, budan buryn BQO-da MI-8 tikushaǵynyń apatqa ushyraýyna baılanysty is sotta qaralyp jatqanyn jazǵan edik.
