Kýáger myltyq pen pyshaqtyń ǵaıyp bolǵanyn esine aldy
TALDYQORǴAN. KAZINFORM – Jetisý oblysynyń qylmystyq ister jónindegi mamandandyrylǵan aýdanaralyq sotynyń ǵımaratynda Sherzat Polattyń ólimine baılanysty sot otyrysy ótip jatyr.
Sot otyrysy barysynda Dana Jaqsygeldi kýáger retinde jaýap berip jatyr. Onyń aıtýynsha, «Qamajaı» dúkeni mańynda bolǵan janjaldan keıin kúdiktiler kólikpen «777» dúkenine barǵan. Sonda Dana Jaqsygeldi kúdiktilerdiń biriniń qolynan pyshaqty kórgen.
— Avtokólikte otyrǵan kezde kóliktiń aldyńǵy oryndyǵynda myltyq turǵanyn kórdim. Odan keıin biz 777 dúkenine bardyq. Oǵan Shyńǵys, Nurqııas, Elmıra kirdi. Elmıra Dizzy sýsynyn alyp shyqty. Ony kólik kapotyna qoıdy. Sosyn Abzal ony maǵan «bere salshy» dedi. Eńkeıip turǵan. Qolyn súrtip turǵandaı boldy. Sosyn ákele jatqanda «quıa salshy» dedi, men quıdym. Basynda baıqaǵan joqpyn, keıin pyshaqtyń júzin baıqadym, — dedi ol.
Prokýror kýágerden bul pyshaqty kim, qaıda tastaǵanyn surady.
— Odan keıin biz kóterilip Rysqulov aýylyna qaraı shyqtyq. Sebebi sol jaqqa qaraı «tartylyńdar» dep bir-birimen sóılesip jatqan. Sol kezde joldan bir jerge toqtap, Shyńǵys degen bala jańaǵy myltyq pen pyshaqty alyp túsedi. Qaıtyp kelgennen keıin qoldarynda eshteńe bolmady, — dedi Dana Jaqsygeldi.
Buǵan deıin ekinshi kýáger qyz Dana Jaqsygeldi oqıǵa týraly baıandady.
Onyń aldynda sotta kýáger Elmıra Nurbekova jaýap berdi.
Ótken aptada sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.
Sondaı-aq Qarjaýbaı Nurymov Sherzattyń qashan jan tapsyrǵanyn aıtty
Sherzattyń anasy Gúlbara Beıshembıeva da qaıǵyly oqıǵa qalaı bolǵanyn eske aldy.
Eske salaıyq, prokýror oqıǵanyń tolyq hronologııasyn baıandady.
Aıyptalýshylardyń kópshiligi kináni moıyndaǵan joq.
Byltyr 4 qazan kúni tóbelesten 16 jastaǵy jasópirim qaıtys bolǵanyn jazǵan edik.
2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady.
2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy.
Bıyl aqpan aıynda Sherzat isine qatysty qylmysty tergeý aıaqtaldy. Qylmystyq is 62 tomnan turady. Tergeý barysynda 40 sot saraptamasy júrgizilip, shamamen 200 kýágerden jaýap alynǵan.