Kýáger: Mataev 334 mıllıon teńge salyq tóleýden jaltarǵan
ASTANA. QazAqparat - Astanada Seıitqazy jáne Áset Mataevtardyń isi boıynsha kýágerlerden jaýap alý jalǵasyp jatyr. Búgin sot zalynda Almaty qalalyq memlekettik kirister departamentiniń ókili Nurlan Serkeev S. Mataev basshylyq etken «Ulttyq baspasóz klýby» qoǵamdyq birlestiginiń iri salyqtyq quqyq buzýshylyqtary jaıly aıtyp berdi.
Almaty qalasy boıynsha memlekettik kirister departamenti aýdıt basqarmasynyń bas mamany Nurlan Serkeevtiń jaýaby boıynsha, ol «Ulttyq baspasóz klýby» QB salyqtyq tekseris júrgizgen.
Uıǵarymmen birge S.Mataevqa salyqtyq tekserý júrgizýge qajetti qujattardy berý talap etildi. Oǵan S.Mataev «UBK» QB esepshi laýazymy qarastyrylmaǵan, 1S bazasynda jáne qaǵaz nusqada býhgalterlik esep júrgizilmeıdi» dep jaýap bergen.
«Men qoldanystaǵy aǵymdyq shottar jóninde «Sberbank Rossıı» AQ ýákiline saýal jiberip, qoǵamdyq birlestiktegi aqshalaı qarajattyń qozǵalysy týraly aqparat aldym. UBK shotyna Almaty men Astanadaǵy ǵımarattardy jalǵa berý, aqparattyq materıal daıyndaý qyzmeti, olardy baspa BAQ pen teleefırge jarııalaý jáne baspasóz-konferentsııalaryn ótkizgeni úshin qarajat túsip turǵan», - dep habarlady kýáger.
Osylaısha, Serkeevtiń túsiniktemesi boıynsha, 2011 jyly UBK 271 207 032 teńge tabys tapqan, 2012 jyly - 173 644 916 teńge, 2013 jyly - 293 685 160 teńge jáne 2014 jyly - 195 025 169 teńge qarajat tapqan.
«Sonymen birge, rezıdent emes qoǵamdyq birlestikterge 2011 jyly - 5 850 800 teńge , 2012 jyly - 25 470 911 teńge, 2013 jyly - 7 280 688 teńge jáne 2014 jyly - 4 275 546 teńge qarjy aýdarylǵan. Osy somalardy eskere kele, Salyq kodeksiniń baptaryna sáıkes, «Ulttyq baspasóz klýby» qoǵamdyq birlestigi QQS tóleýshi retinde esepke turýy tıis edi. Sol sebepti, SK 568-babyna sáıkes, salyq salynatyn somanyń 10% kóleminde 89 425 588 teńge aıyppul salyndy», - dedi N.Serkeev.
Seıitqazy Mataev zańdy tulǵalardyń koroporatıvti tabys salyǵy boıynsha kiristerdi kórsetetin 100.00 salyq eseptemesiniń nysanyn (SEN), joǵaryda kórsetilgen rezıdent emes zańdy tulǵalardyń KTS boıynsha kirisi kórsetilgen 101.04 nysanyn jáne joǵaryda kórsetilgen jeke tulǵalardyń kiristeri kórsetilgen 200.00 nysanyn ótkizý kerek edi. Alaıda, sotta aıypkerdiń kiristerdi jasyryp, tek qana salyq salynbaıtyn kommertsııalyq emes uıymdardyń kiristerin kórsetetin 130.00 nysanyn ótkizgeni aıtyldy.
Osylaısha, tekseris aktisine sáıkes, sot otyrysynda S.Mataev jaltarǵan salyqtyq qaryz korporatıvti tabys salyǵy boıynsha 179,3 mıllıon teńgeni jáne jeke tabys salyǵy boıynsha 65,5 mıllıon teńgeni quraǵany málim boldy.
Sonymen birge, búgin sot densaýlyq jaǵdaıyna baılanysty shaǵymdanǵan Mataevqa eskertý jasady, barlyq apta boıy oǵan qajetti em alýǵa múmkindikter jasaldy biraq aıypker únemi bas tartqan.
