Kýáger QazTAG-pen zańsyz kelisim-shart jasalǵanyn aıtty
ASTANA. QazAqparat - Astanadaǵy №2 Esil aýdandyq sotynda Seıitqazy jáne Áset Mataevtardyń qylmystyq isi boıynsha sot protsesi jalǵasyp jatyr. Ázirshe sot kýágerlerden jaýap alýda. Bul jolǵy sot otyrysynda Baılanys, aqparattandyrý jáne aqparat komıtetiniń burynǵy laýazymdy qyzmetkerleri sotqa jaýap berdi.
Aıta ketelik, sotqa deıingi tergeý is-sharalarynan anyqtalǵandaı, 2010-2015 jyldar aralyǵynda Seıitqazy Mataev óz uly - «QazTAG HAA» JShS-iniń bas dırektory Áset Mataevpen birlesip aldyn-ala bir top adamdarmen sóz baılasyp, aldaý men senimdi teris maqsatqa paıdalaný jolymen memlekettik satyp alý salasyndaǵy iri kólemdegi bıýdjet qarajatyn jymqyrdy. Urlanǵan aqshanyń kólemi 169 mln. teńgeni quraǵan.
Baılanys, aqparattandyrý jáne aqparat komıteti tóraǵasynyń burynǵy orynbasary Bek Arpabaev sotta QazTAG agenttiginiń memlekettik satyp alý konkýrsynda qalaı jeńimpaz bolǵanyn egjeı-tegjeıli áńgimelep berdi. «Komıtettiń burynǵy tóraǵasy Bolat Bersebaev bir kózden qarjylandyrýǵa memlekettik satyp hattamasyn daıyndaýǵa nusqaý berdi. Ol jerde QazTAG agenttigi konkýrs jeńimpazy retinde kórsetildi»,- dep habarlady kýáger sotta.
Óz kezeginde B. Arpabaev komıtet qyzmetkerlerine qajetti qujattardy daıyndaýǵa nusqaý beredi. «Osylaısha QazTAG-pen zańsyz kelisim-shart jasaldy. Bul zańsyz sheshim bolatyn. Sebebi QazTAG buǵan deıingi memlekettik satyp alý konkýrsyna qatysqan joq. Bizdiń mundaı kelisim-shart jasaýǵa qaqymyz joq edi. Soǵan qaramastan, bul kelisim-shart jasaljy»,- dedi ol sottaǵy jaýabynda.
Kýáger komıtette QazTAG-tan kelgen esepterdi qabyldaý kezindegi zańsyzdyqtar týraly da áńgimeledi. «Atqarylǵan jumystar týraly aktide de kemshilikter kóp boldy. Aı saıyn agenttik 40-50 jańalyq taratý kerek bolsa, onyń ornyna bar-joǵy 100 jańalyq taratyldy. Sonymen qatar, atalǵan agenttik taratqan jańalyqtardy kez-kelgen oqyrman oqı almaıtyn edi. Óıtkeni aqparat jabyq taratyldy. Bul da úlken zań buzýshylyq bolyp tabylady»,- dedi B. Arpabaev. Prokýrordyń atqarylǵan jumystar týraly aktini nege teksermegeni jónindegi suraǵyna ol: «Men Seıitqazy Mataevqa sengendikten atqarylǵan jumystar týraly aktini teksermedim» dep jaýap berdi.
Aıta ketelik, Qazaqstan Respýblıkasy Qylmystyq Kodeksiniń 65-inshi babyan sáıkes, óziniń teris qylyqtaryna ókiný men tergeýge kómektesýine baılanysty Baılanys, aqparattandyrý jáne aqparat komıtetiniń, «Qazaqtelekom» AQ-nyń laýazymdy tulǵalary qylmystyq jaýapkershilikten bosatylǵan bolatyn.
Ámirlan Álimjan
