Kýáger: «QazTAG» HAA eseptemeleri tehnıkalyq erekshelikke saı bolǵan joq
ASTANA. QazAqparat - Aı saıyn «QazTAG» HAA aqparat komıtetindegi memlekettik aqparattyq saıasatty júzege asyrý jóninde eseptemeler berip otyrǵan. Alaıda, atqarylǵan jumys aktileri tehnıkalyq erekshelikke saı bolmaǵan.
Tergeý nusqasy boıynsha, 2010-2015 jyl aralyǵy kezeńinde Seıitqazy Mataev uly - «QaTAG» HAA» JShS bas dırektory Áset Mataevpen aldyn ala sóz baılasyp, aldaý jáne senimdi teris paıdalaný jolymen asa iri kólemde memlekettik satyp alý salasyndaǵy bıýdjettik qarajattardy jymqyrǵan. Urlyq somasy 169 mln.-nan astam teńgeni quraıdy.
«QazTAG» HAA» JShS kórsetilgen qyzmetterdi teksere kele, olardyń tehnıkalyq erekshelikke sáıkestigi jóninde suraq týyndady. Jarııalanǵan materıaldardyń taqyryptyq baǵyty boıynsha sáıkessizdikter anyqtaldy, aqparattyq habarlamalarǵa ruqsat bolmaǵan, ortalyqazııalyq memleketterdiń agenttikterinde materıaldar jarııalanbaǵan», - dedi Baılanys, aqparattandyrý jáne aqparat komıteti baspasóz BAQ basqarmasynyń burynǵy sarapshysy Erlan Ydyrysov.
Kýágerdiń aıtýynsha, ol atalǵan másele boıynsha «QazTAG» HAA» JShS ókili Janel Zamanbekovaǵa habarlasqan, Janel bul máseleni sheshýge qaýqarsyz ekenin aıtyp, Áset Mataevqa jetkizetinin aıtqan.
Osy áńgimeden keıin Baılanys, aqparattandyrý jáne aqparat komıtetiniń tóraǵasy Talǵat Qazanǵap Erlan Ydyrysovty shaqyryp alyp, «QazTAG» HAA» JShS ákelgen atqarylǵan jumys aktilerine qol qoıý týraly tapsyrma bergen. «Budan bylaı «QazTAG» HAA» JShS-ny teksermeý týraly tapsyrma berdi», - dedi kýáger.
Óz kezeginde Talǵat Qazanǵap S.Mataevtyń abyroı-bedeline senim artqan. «Aktiler men eseptemelerge qol qoıdym. Biraq, S.Mataevtyń abyroı-bedeline senim artyp, atqarylǵan jumys kóleminiń naqtylyǵy, esepterdiń durystyǵy jáne tehnıkalyq erekshelik pen kelisimshart talaptaryna sáıkestigin teksermedim», - degen edi T.Qazanǵap.
Osy oraıda Ydyrysov E.A. memlekettik aqparattyq saıasat júrgizý qyzmeti boıynsha «QazTAG» HAA» JShS eseptemelerine jáne kórsetilgen qyzmetter aktilerine qol qoıǵan. Alaıda, onda keltirilgen málimetterdi teksermegen.
