Kýáger «BTA Bank» Ábilıazovtiń baqylaýyna qalaı ótkenin aıtyp berdi
TARAZ. QazAqparat - Tarazda Muhtar Ábilıazovqa qatysty qylmystyq is boıynsha sot protsesi ótýde. Onda ań aýlap júrgende óltirilgen bankır Erjan Tátishevtiń dúnıe-múlkine qatysty jańa mán-jaılar anyqtalýda, dep habarlaıdy QazAqparat tilshisi.
Eske salaıyq, qylmystyq is boıynsha basty sot talqylaýy Jambyl oblystyq qylmystyq ister jónindegi mamandandyrylǵan óńiraralyq sotynda sýdıa Kenjeǵalı Kenjebekovtiń tóraǵalyǵymen ótip jatyr. Memlekettik aıyptaýshylar: prokýrorlar - Ashan Nurlybaev jáne Іlııas Isqalıev. Kýágerler retinde barlyǵy 100-den astam adam ótýde. Іstiń kólemi - 15 tom. Muhtar Ábilıazov Qazaqstan Respýblıkasynyń Qylmystyq kodeksiniń (1997 jylǵy redaktsııasynda) 28-babynyń 3-bóliginde, 96-babynyń 2-bóliginiń «j» «z» tarmaqshalarynda (adam óltirýdi uıymdastyrý, adamdy jaldaýmen para-par, paıdakúnemdik maqsatta aldyn ala sóz baılasý arqyly bir top adammen ózge adamdy qasaqana óltirý) kórsetilgen qylmystyq quqyqbuzýshylyqty jasady degen aıyp taǵylyp otyr.
Búgin sot BTA Banktiń burynǵy top-menedjeri Jaqsylyq Jarymbetovtiń jaýaptaryn tyńdady. Ol QR Ulttyq qaýipsizdik komıtetiniń burynǵy basshysy Nartaı Dútbaev Ábilıazovtiń túrmeden shyǵýyna kómekteskenin aıtty. Túrmeden shyqqan soń Ábilıazov Reseıde óz jobalaryn damytyp, bıznes bastaǵan. Tátishevti Ábilıazovtiń bıznes-jobalaryna (basym deni Reseıde boldy), sondaı-aq «Betpaq-dala» kompanııasyn damytýǵa bankten nesıe retinde 300 mln dollar bólýge májbúrlegen. «Men Tátishevti bilemin, ol Ábilıazovqa bul qarajattardy eshqashan bermes edi. Óıtkeni olardyń qarym-qatynasy dúrdaraz bolatyn», - dedi kýáger.
Erjan Tátishevtiń 2004 jyly ań aýlap júrgende óltirilgeni týraly suraqqa J. Jarymbetov oqtyń kezdeısoq atylǵany týraly sol kezdegi resmı habarlamaǵa senimsizdikpen qaraıtynyn aıtty. «Sol kezde Tátishevke Ábilıazov pen onyń múddesin qorǵap kelgen Dútbaevtiń tarapynan qysym kórsetildi. Tátishevtiń kásiporyndaryna UQK tarapynan tekserister júrgizildi. Maǵan Tátishev kúızelis ústinde júrgeni aıtyldy. Ol óz kóńilin basqaǵa aýdarý úshin jıi ańǵa shyǵyp turdy», - dedi ol.
Kýáger óziniń Londonǵa májbúrli túrde qonys aýdarylǵan kezdegi Ábilıazovpen qupııa áńgimeleri týraly da aıtty. «Kezektegi áńgimelerdiń birinde Erjan Tátishevtiń oqıǵasyna qatysty suraǵyma Ábilıazov: «Mýrka óziniń isin istedi. Saǵan ol nege kerek, aralaspa», - dep jaýap berdi. Ol kezde onyń aıtqan sózin túsingen joqpyn. Óıtkeni óz sharýalarymmen basym qatyp júrdi. Keıin onyń maǵynasyn qaıta oılandym. Basqa faktilermen salystyryp otyryp, eshbir máni joq sııaqty kóringen sózderdiń astarynda, shyn máninde ne jatqanyn túsine bastadym»», - dedi Jarymbetov.
Kýáger ózin Erjan Tátishevtiń jaqyn dosy dep sanaǵanyn, onyń ólimi qabyrǵasyn qaıystyrǵanyn jetkizdi.
«Tátishevtiń jesiri men Ábilıazovtiń kelissózderinde dosymnyń qurmetine onyń áıeliniń múddesin qorǵadym. Ókinishke qaraı, oqıǵalar osylaı órbip, men uzaq ýaqyt boıy Ábilıazovpen baılanysta boldym. Jáne Mýrkanyń moıyndaǵany (a, esime tústi, adam óltirý boıynsha Murathan Toqmádı kúdikti bolǵan edi) men úshin sýyt habar edi. Men buryn da Tátishevtiń ólimi Ábilıazovqa tıimdi dep sanaıtynmyn, biraq barynsha bul oıdan aýlaq bolýǵa tyrystym. Onyń jaýaby muny teriske shyǵardy. Tátishev ólgennen 5-6 aıdan keıin Ábilıazov «BTA Banktiń» baqylaýyn tolyq ózine qaıtardy. Bir anyǵy, Erjan Tátishev tiri turǵanda bul múmkin emes edi», - dep atap ótti ol.
Eske sala keteıik, ústimizdegi jyldyń aqpan aıynda Jambyl oblysy qylmystyq ister jónindegi mamandandyrylǵan óńiraralyq soty bıznesmen, buryn uıymdasqan qylmystyq top basshysy bolǵan, 2004 jyly bankır Erjan Tátishevti óltirdi dep aıyptalǵan Murathan Toqmádıdi 10 jyl 6 aıǵa bas bostandyǵynan aıyrǵan bolatyn. Sotta Murathan Toqmadı jaqyndary úshin alańdaǵanyn, oǵan qoqan-loqqy kórsetilip, otbasy bul qysymnan qoryqqandyǵyn, sondaı-aq Muhtar Ábilıazovten Erjan Tátishevti óltirý úshin eki transhpen 4 mıllıon dollar kóleminde syıaqy alǵanyn moıyndaǵan.
