QTJB-ny jekeshelendirý halyqtyń arasynda úreı týdyratyndaı jaıt emes - A.Jumaǵulov
ASTANA. QazAqparat - Qazaqstannyń turǵyn úı qurylys jınaq bankin jekeshelendirý halyqtyń arasynda úreı týdyratyn jaıt emes. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Turǵyn úı qurylys jınaq banki basqarma tóraǵasy Aıbatyr Jumaǵulov málim etti.
«Búgingi kúnde jekeshelendirý (Turǵyn úı qurylys jınaq bankin) týraly sheshim bar. Biraq, shyndyǵyn aıtqanda eshqandaı ınvestor týraly naqty másele qaralyp otyrǵan joq. Jekeshelendirý bolǵannyń ózinde onyń 50, 20 nemese 100 paıyz jekeshelendiriletindigi jaıynda naqty sheshim de joq. Ol bolashaqta áleýmettik máselelerdi eskere otyryp sheshiledi»,- dedi ol.
A.Jumaǵulovtyń atap ótýinshe, áleýetti ınvestorlardyń turǵyn úı jınaq júıesinde tájirıbesi mol, qarjylyq áleýeti joǵary bolýy qajet. Sonymen qatar, ol tek qana qarjymen ǵana kelmeı tehnologııa da ákelýi tıis.
Sonymen qatar, A.Jumaǵulov banktiń jekeshelendirilýine qatysty halyqtyń arasynda qate túsinik bar ekendigin atap ótti.
«Turǵyn úı jınaq júıesi zańmen retteledi. Memlekettik syıaqy, depozıt pen beriletin nesıe arasyndaǵy marja zańmen rettelgen. Sondyqtan, banktiń jeke nemese memlekettik bolǵanynda esh aıyrma joq. Sol sebepti menińshe, jekeshelendirý halyqtyń arasynda úreı týdyratyn jaıt emes»,- dedi bank basshysy.
