QTJB «Qoljetimdi baspana - 2020» baǵdarlamasy boıynsha páter satyp alýshylar pýlyn jasaqtaý sharttaryn túsindirdi

«Bank salymshylary bolyp tabylatyn azamattar osy baǵdarlama boıynsha Astana qalasynda salynyp jatqan 3 úıden páter alýǵa óz ótinishterin ótkizip, úmitker bola alady. Jalpy páter sany - 1013. Onyń ishinde 1 jáne 4 bólmeli páterler salý josparlanǵan, 1 sharshy metri - 142 500 teńge. Qurylystyń aıaqtalý merzimi - 2013 jyldyń 30 qarashasy», - dedi atalǵan banktiń atqarýshy dırektory Murat Sháripov búgin elordada ótken baspasóz máslıhaty barysynda..

Onyń atap ótýinshe, árbir azamat salymshy retinde bankke ótinish tapsyrady. Bul ótinishterdi qabyldaý 2 aıǵa sozylady . Ótinish qabyldanǵan kezde salymshynyń ótinishine qabyldanǵan ýaqyt pen kúni belgilenip, avtomattandyrylǵan júıede tirkeledi. Tirkelgen ótinishter qabyldanyp bolǵannan keıin talaptarǵa sáıkes avtomatty túrde ball sanalady.

«Birinshi talap - salym jınaqtaý merzimi. Jınaqtaý merzimine 30 ballǵa deıin beriledi. Máselen, eger salymshy 9 aıdan 18 aıǵa deıin jınaqtaǵan bolsa 5 ball beriledi. 18 aıdan 28 aıǵa deıin 10 ball, 27 aıdan 36 aıǵa deıin 20 ball, al 36 aıdan joǵary bolsa 30 ball eseptelinedi»,- dedi ol.

Ekinshi talap - salymdardyń mólsheri. Bul azamattardyń jınaǵan aqshasynyń mólsheri. Oǵan da 30 ballǵa deıin beriledi. Eger kelisimsharttyń 12,5-inen 25 paıyzyna deıingi kóleminde qarjy jınaqtalsa 5 paıyz, 25-ten 37 paıyzǵa deıin 10 ball, 37-den 50 paıyzǵa deıin 20 ball, al elý - 50 paıyzdan joǵary bolsa 30 ball beriledi.

Úshinshi talap - baǵalaý kórsetkishi, oǵan 70 ballǵa deıin eseptelinedi. Salymshy eń tómengi kórsetkishke jetse 30 ball, al eger turǵyn úı jınaqtaý kezinde kórsetkishtiń belgilengen máni 2 jáne odan da joǵary bolsa, tolyq 70 ball alady. Eskererligi, turǵyn úı jınaǵy boıynsha salymdar neǵurlym uzaq jyl jınaqtalǵan bolsa, baǵalaý kórsetkishiniń de bally joǵary bolady.

«Ball eseptelingen soń tizim bank saıtynda ornalastyrylady. Joǵary ball alǵan ótinish berýshiler salynyp jatqan baspana sanyna qaraı zaemdy óteý úshin tólem qabilettiligin rastaýǵa shaqyrylady. Tólem qabiletin rastaǵan kezde zaemdy óteı almaıtyn bolǵan jaǵdaıda jalǵa berý múmkindigi qarastyrylady. Eger jalǵa berý múmkindigine tóleý qabileti jetpeıtin bolsa, onda kezek tizim boıynsha kelesi turǵan azamatqa beriledi», - dedi M.Sháripov.