«QTJ» júk vagondaryn kóptep shyǵarýdy josparlap otyr
ASTANA. QazAqparat - Qazaqstannyń temir joldarynda bolashaqta tek otandyq óndiris oryndarynan shyqqan júk vagondary qoldanylatyn bolady. Bul týraly «Qazaqstan temir joly» UK» aktsıonerlik qoǵamynyń baspasóz qyzmeti habarlady.
Baspasóz málimetterine qaraǵanda, «QTJ» UK» AQ Tehnıkalyq ortalyǵy memlekettik deńgeıdegi, óndiristik sektordaǵy kásiporyndardyń jáne jyljymaly quram menshik ıeleriniń qoldaýymen júk vagondaryn shyǵarýdy damytý baǵdarlamasyn jasady.
«QTJ» UK» AQ Tehnıkalyq ortalyǵynyń dırektory Azamat Jankeldiniń aıtýynsha, atalmysh baǵdarlama qazaqstandyq júk vagondaryn shyǵaratyn kásiporyndarǵa biryńǵaı tehnıkalyq talaptar qoıa otyryp, eldiń jyljymaly quramyn jańǵyrtýdy kózdeıdi.
«Jańa jabyq vagondar, jartylaı vagondar, tsısterna jáne platformalar jyljymaly quramǵa qatysty tehnıkalyq reglamentteýdiń mindetti talaptarynan ótip, sertıfıkattalǵan soń, memleketaralyq baǵdarlarǵa da shyǵýǵa ruqsat alatyn bolady»,- dep atap ótti A. Jankeldi.
Onyń aıtýynsha, jańa jyljymaly quramdarǵa qoıylatyn mańyzdy talaptar - kólemin arttyrý, jóndeý aralyǵy merzimin uzartý, konstrýktsııalyq jyldamdyq, júk kóterý qýatyn kóbeıtý, júk vagondarynyń qorabynyń salmaǵyn azaıtý. Bul óz kezeginde temirjol jyljymaly quramyn sońǵy úlgidegi júk vagondarymen jańǵyrtý, parktiń jalpy júk kóterý deńgeıin, jyldamdyǵyn, qyzmet kórsetý sapasyn, tasymaldaý qaýipsizdigin kóterýdi qamtamasyz etedi.
Júk vagonyna qoıylatyn talaptar bıylǵy jyl aıaǵyna deıin bekitilip, qarjylyq ınstıtýttar arqyly baǵdarlamany qarjylandyrý mehanızmi qarastyrylady.
«Jumys toby ózimizdiń menshiktegi júk vagondaryn shyǵarý óndirisin qarjylandyrý kózderin qarastyrýda. Daıyndaýshy zaýyttarǵa jáne jergilikti úlesti kóterý arqyly ımport almastyrýǵa Memlekettik qoldaý kórsetýge jeńildikter jasaý sharalary belgilenip otyr»,-deıdi A. Jankeldi.
«Júk vagondaryn shyǵarýdy qoldaýdyń baǵdarlamasyn júzege asyrý arqyly jylyna 6 júk vagony óndiristen shyǵarylsa, 1,5 myń jumys orny ashylady, eńbek kórsetkishi 1,9 esege kóteriledi»,-deıdi «QTJ» UK» AQ Tehnıkalyq ortalyǵynyń basshysy.
