«QTJ - Júk tasymaly» AQ rekord ornatty
NUR-SULTAN. QazAqparat - 2019 jyly qazaqstandyq temirjol jelisi boıynsha 255 mln. tonna júk tasymaldanǵan.
Bul byltyrmen salystyrǵanda 261 myń tonnaǵa artyq. Bul týraly brıfıngte «QTJ - Júk tasymaly» AQ Bas dırektory Qaırat Saýyrbaev aıtty, dep habarlaıdy QazAqparat tilshisi.
«Bul sońǵy alty jyldaǵy rekordtyq kórsetkish. Tıelgen júktiń úshten bir bóligi - 82,5 mln. tonnasy eksportqa jóneltildi. Aktsıonerlik qoǵamnyń negizgi qyzmetinen túsken tabys 2019 jyly 930 mlrd. teńgeden asty. Bul ótken jylmen salystyrǵanda 8% kóp», - deıdi Qaırat Saýyrbaev.
Ol ulttyq tasymaldaýshy turǵyndar men kommýnaldy-turmystyq kásiporyndarǵa kómir men astyq sııaqty áleýmettik mańyzy bar júkterdi tasymaldaý josparyn jyl saıyn tolyq kólemde oryndaıtynyn aıtty.
«Tasymaldaýshy men qazaqstandyq vagon ıeleriniń, atap aıtqanda «Qaztemirtrans« AQ men «Astyqtrans« AQ kómir men astyq tasymalyna qatysty ótinishterdi 100% oryndady», - deıdi ol.
Bas dırektor 2020 jyly nege basymdyq beriletinine toqtalyp ótti.
«Bıyl QHR temir rýdasyn, astyq pen burshaq daqyldaryn, Ortalyq Azııa elderine baǵyttalǵan qurylys júkterin, tsementti eksporttaý jáne tranzıt ósimi esebinen tıeý kólemin 2,5% arttyrý kózdelip otyr. Qazaqstandyq kómirdi Ózbekstanǵa jáne QHR arqyly Ońtústik-Shyǵys Azııaǵa tıeý artady dep josparlanýda», - deıdi Qaırat Saýyrbaev.
