QTJ júk tasymalynda óz ekspedıtorlaryna erekshe jaǵdaı jasap otyr - senator
Senator Zakırjan Kýzıev «Qazaqstan temir joly» ulttyq kompanııasynyń ústinen tekserý júrgizip, Kólik mınıstrin palata depýtattarynyń aldyna keltirýdi surap depýtattyq saýal joldady, dep habarlaıdy Kazinform.
«Ókinishke qaraı, Úkimet pen QTJ basshylyǵynyń búkil talpynysyna qaramastan temirjol holdıngin tıimdiligi joǵary ete almadyq. Onyń ústine keıingi jyldary atalǵan salada birqatar salmaqty problemalar qordalanyp qaldy. Búkil el aýmaǵynda temirjol jelisi jetkilikti deńgeıde damymaı jatyr. Negizgi quraldardyń tozý kórsetkishi, jolaýshy tasymaldaý quramynyń tapshylyǵy, servıs sapasyzdyǵy ósip jatyr. «QTJ» parkinde qazirgi tańda 2228 vagon bar. Onyń ishinde 776 vagonnyń nemese 35 paıyzynyń «jasy» 28 jyldan asyp ketken. Jolaýshy vagondarynyń ortasha tozý kórsetkishi – 53 paıyz, júk vagondarynda – 55 paıyz, al lokomotıvterde 67 paıyzdan asyp ketken. Bul problema Qazaqstan arqyly ótetin tranzıttiń tartymdylyǵyn kúrt nasharlatyp, kórshiles elderdi balama marshýrttar izdeýge májbúr etip otyr», - dep bastady ol saýalyn.
Aıtýynsha, qazan aıynyń basynda senatorlarǵa Ulttyq ekspedıtorlar qaýymdastyǵy shaǵymdanǵan.
«Olar óz ótinishinde «QTJ-Júk tasymaly» kompanııasy eksport pen tranzıt tasymalynyń negizgi jáne qosymsha josparlaryn maquldaýdan bas tartqanyn atap kórsetti. Al «Kedentransservıs» jáne «KTZ Express» sııaqty óz ekspedırtorlarynyń jospary kedergisiz iske asyp jatyr», - deıdi depýtat.
Senator Básekelestikti qorǵaý jáne damytý agenttigi de QTJ-nyń «óz» kompanııalaryna birqatar artyqshylyqtar beretinin anyqtaǵanyn eske saldy.
«QTJ qyzmetiniń túrlerine jasalǵan taldaý nátıjesinde monopolııaǵa qarsy organ qyzmettiń 424 túriniń tek 81-i, ıaǵnı 19% ǵana kelisilgeni anyqtaldy. Osylaısha, QTJ óz is-áreketterimen eksport tasymalynyń ondaǵan jyldar ishinde jolǵa qoıylǵan tehnologııasyn buzyp, báseke teńsizdigin qalyptastyryp otyr.
Onyń magıstral jelisindegi qozǵalysty josparlap, basqarýdyń tıimsiz ekeni aıtylyp júr. Jyl basynan beri 400-den astam tasymal quramy jol orta qalǵan qalpy, qańtarylǵan. Jalpy saladaǵy avtomattandyrý deńgeıi tómen. Al negizi QTJ-nyń negizgi tabys kózi júk tasymalynan túsedi – 86 paıyzdan astam. Saldarynan temirjolymyz ishki naryqta da, onyń syrtynda da básekege qabiletsiz bolyp otyr», - dedi Zakırjan Kýzıev.
Senatorlar Kólik mınıstrligi men «Qazaqstan temir joly» UK» AQ-na birneshe ret depýtattyq saýal joldaǵanymen, máseleni sheshýge yqylasy joq salǵyrt jaýaptar kelge kórinedi.
«Júk jóneltýshiler men bıznes sýbektileriniń kóptegen shaǵymdaryn eskere otyryp, sizden QTJ qyzmetine tekserý uıymdastyrýdy, sondaı-aq Kólik mınıstrliginiń basshylyǵyn jáne buryn joldanǵan depýtattyq saýaldarǵa aýyzsha jaýap berý úshin QTJ basshylyǵyn Senatqa jiberýdi suraımyz», - dedi depýtat Senat depýtaty.
