«QTJ–Júk tasymaly» kompanııasynan negizsiz jumystan shyǵarylǵandar qaıta qabyldandy

AQTÓBE. KAZINFORM – «QTJ – júk tasymaly» JShS-de teplovoz mashınısiniń qosalqy kómekshisi bolyp jumys istep, negizsiz shyǵarylǵan 9 adam sot arqyly óz quqyǵyn qorǵady. Sonymen birge jumys berýshi bos júrgen ýaqyt pen moraldyq zııan ótemaqysy retinde árqaısysyna 900 myń teńge tóleýi tıis. 

Aqtóbe oblystyq soty baspasóz qyzmetiniń habarlaýynsha, 9 adam «QTJ – júk tasymaly» JShS-ine teplovoz mashınısiniń qosalqy kómekshisi bolyp jumysqa qabyldanǵan. Bir jarym aı ótken soń «QTJ – júk tasymaly» JShS-i atqaratyn laýazymyna sáıkes kelmeýine baılanysty olarmen aradaǵy eńbek kelisimsharttaryn buzǵan.

Eńbek sharttaryn toqtatýǵa keńes hattamasy negiz bolǵan. Onda kadrlardy irikteý konkýrstyq komıssııasy quramynyń sáıkes kelmeýi, synaq merziminde eńbek sharttaryn tıisinshe rásimdemeý sekildi birqatar buzýshylyq tirkelgen. 

– Jumystan bosatylǵan seriktestik qyzmetkerleri óz eńbek quqyqtaryn qorǵaý úshin Aqtóbe qalalyq sotyna júgingen. Sot talap qoıýshylardyń job.railways.kz saıty arqyly jumysqa ornalasqanyn, konkýrsqa qatysý úshin barlyq qajetti qujattar jáne olardyń kásibı qabiletterin rastaıtyn qujattar tapsyrǵanyn anyqtady. Sot taraptar bergen dáleldemelerdi jan-jaqty baǵalaı otyryp, jumystan bosatýǵa negiz joq degen tujyrymǵa keldi. Sot jumystan bosatylǵan qyzmetkerlerdiń laýazymdaryn qalpyna keltirdi. Jumys berýshiden ár talap qoıýshy paıdasyna 900 myń teńge shamasynda májbúrli bos júrgen ýaqyt pen moraldyq zııan ótemaqysy óndirildi. Sot sheshimi zańdy kúshine engen joq, - dep habarlady Aqtóbe oblystyq sotynyń baspasóz qyzmeti. 

Aıta keteıik, Aqtóbede páter satyp almaq bolǵan 17 adamdy aldaǵan alaıaq áıel sottaldy. Ol 6 jylǵa bas bostandyǵynan aıyryldy.