QTJ jolaýshylar poıyzynyń keshigý sebebin túsindirdi
NUR-SULTAN. QazAqparat – «QTJ» UK» AQ temirjol joldarynda kúrdeli jóndeý júrgizilýine baılanysty jolaýshylar poıyzdarynyń qozǵalys kestesinde ózgerister bolatynyn málim etti, dep habarlaıdy QazAqparat tilshisi kompanııanyń resmı saıtyna silteme jasap.
«Bıylǵy jyldyń sáýir aıynan bastap qozǵalys qaýipsizdigin jáne jolaýshylar men júk poıyzdarynyń jyldamdyǵyn arttyrýǵa baǵyttalǵan temirjol joldaryn jańartý jumystary bastaldy. Jumystar shtattyq rejımde, kidirissiz júrip jatyr. Koronavırýs ınfektsııasymen kúres aıasynda qabyldanǵan barlyq qaýipsizdik sharalary eskerildi. «QTJ» UK» AQ keltirilgen qolaısyzdyqtar úshin jolaýshylardan keshirim suraıdy jáne jumysty tezirek aıaqtaý úshin barlyq qajetti sharalar qabyldaıdy», - delingen habarlamada.
Kompanııa «Temir jol kóligi týraly» Qazaqstan Respýblıkasynyń 2001 jylǵy 8 jeltoqsandaǵy Zańynyń 80-babynyń 3-tarmaǵyna sáıkes jolaýshylar poıyzy keshikkeni úshin aıyppul tóleý kózdelgenin eske salady.
80-baptyń 3-tarmaǵyna sáıkes, «Jolaýshylar tasymaldaıtyn poıyzdy kidirtkeni, sondaı-aq baratyn temirjol stantsııasyna keshigip kelgeni úshin tasymaldaýshy, eger kidirý nemese keshigý tejeýsiz kúshtiń saldarynan bolǵanyn dáleldeı almasa, jolaýshynyń shekken zalalyn óteı otyryp, oǵan keshikken ár saǵat úshin jol júrý qujaty (bıleti) qunynyń úsh protsenti mólsherinde aıyppul tóleıdi».
Óndirip alynǵan aıyppuldyń somasy jol júrý qujatynyń (bılettiń) qunynan aspaýǵa tıis.
Jolaýshy poıyzy keshikkeni úshin aıyppul tóleý tasymaldaý erejelerine sáıkes jolaýshynyń ótinishi boıynsha júrgiziledi.
Ótemaqy alý úshin jolaýshy sońǵy kelý pýnktindegi vokzal kezekshisinen jol júrý qujatynda (bılette) keshiktirilgen saǵattar týraly jazbany mindetti túrde alýy kerek. Osy qujatpen, sondaı-aq jeke basyn kýálandyratyn qujatpen birge jolaýshy zańda kózdelgen ótemaqyny alý úshin QTJ-nyń kez-kelgen kassasyna júgine alady.
