QTJ jol apattarynan keıin temirjol ótkelderindegi baqylaýdy kúsheıtti

ASTANA. QazAqparat - «QTJ» UK» AQ 2018 jyly 83 temirjol ótkelin qorshaýdy alýdy kózdep otyr,  dep habarlaıdy QazAqparat kompanııanyń baspasóz qyzmetine silteme jasaı otyryp.

QTJ aqparatyna sáıkes, bıylǵy jyldyń 11 aıynda 14 jol-kólik oqıǵasy tirkeldi.

Sońǵy jyldary josparly túrde kúzetilmeıtin temirjol ótkelderi kúzetiletin ótkelge aınaldyrylýda. Máselen, 2015-2017 jyldary 127 jol ótpesi kúzetiletin boldy. 38 jol ótkelinen qorshaý qurylǵylar ornatyldy. 2018 jyly 83 jol ótkelinde osyndaı qurylǵylar ornatý josparlanyp otyr.

«Avtokólik ıeleri jol qozǵalysy tártibin óreskel buzýy toqtalmaı keledi. Júrgizýshiler óz ómirlerine qaýip tóndirip qana qoımaı, jolaýshylardyń da ómirine qaýip týǵyzýda. Temirjol boıyndaǵy qozǵalystyń kún sanap qarqyn alýyna baılanysty ondaǵy qaýip-qater de kúsheıip keledi. Soǵan baılanysty temirjol jelileriniń boıyndaǵy qaýipsizdik sharalary tártibin kúsheıtýdi qajet etedi», - delingen habarlamada.

QR Investıtsııalar jáne damý mınıstrligi QR «Ákimshilik quqyq buzýshylyq» týraly Kodeksiniń 559-babynyń 5-tarmaǵyna temir joldy belgilenbegen tusynan kesip ótýshige aıyppul kólemin 3-ten 10 AEK-ke  deıin ulǵaıtý kózdelýde.  Atalmysh shara temirjol mańynda belgilenbegen oryndardan ótýshilerge jaýapkershilikti kúsheıtip, ol óz kezeginde poıyz qozǵalysy qaýipsizdigin kóterýge yqpal etetin bolady, - dep málim etti QTJ.

Mamandardyń saraptaýynsha, jol kólik oqıǵalarynyń teń jartysy poıyzdyń jaqyndap qalǵandyǵyn eskermeı ótetin avtokólik júrgizýshilerdiń kinásinen, 14% shlagbaýmdy aınalyp ótý, 36%  basqa da sebepterden.

Eske sala ketsek, qarashanyń 25-inde Mańǵystaýda manevrlik TEM-2 teplovozy men jolaýshylar mingen «Gazel» soqtyǵysyp, 9 adam qaza taýyp, 27-si jaraqat aldy.