Qazaqstanda maıly daqyldar alqaby rekordtyq deńgeıge jetti
ASTANA. KAZINFORM — Aýyl sharýashylyǵy mınıstri Aıdarbek Saparovtyń tóraǵalyǵymen ótken keńeste 2026 jyldyń birinshi jartyjyldyǵyndaǵy ósimdik sharýashylyǵy salasynyń damý qorytyndylary, vegetatsııalyq kezeńniń ótý barysy jáne aldaǵy egin oraǵy naýqanyna daıyndyq máseleleri qaraldy.
Aýyl sharýashylyǵy vıtse-mınıstri Azat Sultanov egis alqaptaryn kezeń-kezeńimen ártaraptandyrý jáne tabystylyǵy joǵary daqyldarǵa kóshý jumystarynyń júıeli túrde jalǵasyp jatqany týraly baıandady.
Atap aıtqanda, maıly daqyldardyń egis alqaby 4,3 mln gektarǵa jetti. Bul — eń joǵary kórsetkish. Mal azyqtyq daqyldardyń egis kólemi 3,3 mln gektarǵa, júgeri alqaby 253,4 myń gektarǵa deıin ulǵaıtyldy. Sonymen qatar, bıdaı alqaby 125 myń gektarǵa qysqartylyp, ońtústik óńirlerde dástúrli sýarmaly kúrish pen maqta egistiginiń kólemi ońtaılandyryldy.
Keıingi úsh jylda egis qurylymyndaǵy dándi daqyldardyń úlesi 73%-dan 66%-ǵa deıin tómendep, maıly daqyldardyń úlesi 18%-ǵa deıin ósti. Eń joǵary nátıjeler elimizdiń negizgi astyqty óńirlerinde tirkeldi.
Aýyl sharýashylyǵy taýaryn óndirýshilerdi mıneraldyq tyńaıtqyshtarmen qamtamasyz etý deńgeıin arttyrý jumystary jalǵasýda. Bıyl josparlanǵan kólemniń 78%-yna kelisimshart jasalyp, tyńaıtqyshtar jerge engizildi. Keńeste egin oraǵy naýqanyna daıyndyq jáne astyq qabyldaý ınfraqurylymynyń úzdiksiz jumysyn qamtamasyz etý máselesine le erekshe nazar aýdaryldy.
Elimizdegi astyq saqtaý qoımalarynyń jalpy syıymdylyǵy 30,7 mln tonnany quraıdy. Demek, boljanyp otyrǵan ónim kólemin tolyq kólemde qabyldaýǵa múmkindik jetkilikti.
Mınıstr elevatorlardyń júktemesin azaıtýdy jáne qajet bolǵan jaǵdaıda jańa ónimdi qabyldaý múmkindigin arttyrý maqsatynda astyqty elimizdiń ońtústik óńirlerine tasymaldaýdy uıymdastyrýdy tapsyrdy.
Agrometeorologııalyq monıtorıng derekterine sáıkes, aýa raıy jaǵdaılarynyń árkelki bolýyna qaramastan, aýyl sharýashylyǵy alqaptarynyń basym bóliginde ónimdi ylǵal qory ońtaıly deńgeıde saqtalǵan. Dándi jáne maıly daqyldar egistiginiń 99%-dan astamynyń jaǵdaıy jaqsy jáne qanaǵattanarlyq dep baǵalanýda. Bul mol ári sapaly ónim alýǵa qolaıly alǵyshart qalyptastyryp otyr.
Ońtústik jáne batys óńirlerde kúzdik daqyldardy jınaý jumystary bastaldy. Búgingi kúni 635,8 myń tonna astyq bastyryldy. Ortasha ónimdilik gektaryna 20,6 tsentnerdi qurady.
Jıyndy qorytyndylaı kele, mınıstr aýdandar men óńirlerdegi astyq qabyldaý beketteriniń jaı-kúıine jan-jaqty taldaý júrgizýdi jáne olardyń jappaı egin oraǵy bastalǵanǵa deıin tolyq daıyn bolýyn qamtamasyz etýdi qatań tapsyrdy. Sonymen qatar aýa raıyna baılanysty táýekeli joǵary óńirlerdi der kezinde aıqyndap, aldyn ala jedel sharalar qabyldaýdy, sondaı-aq mıneraldyq jáne organıkalyq tyńaıtqyshtardy engizý jumystaryn josparǵa saı tolyq oryndalýyn qamtamasyz etýdi mindettedi.
— Egin oraǵy naýqany — qalt jiberýge bolmaıtyn, eń jaýapty kezeńderdiń biri. Vegetatsııalyq kezeńniń ótýine, tehnıkalardyń, elevatorlardyń jáne logıstıkalyq ınfraqurylymnyń daıyndyǵyna qatysty barlyq másele turaqty baqylaýda bolýǵa tıis. Ortalyq jáne jergilikti atqarýshy organdardyń jumysyn naqty úılestirip, egindi ońtaıly merzimde ysyrapsyz jınaýdy, sondaı-aq jańa ónimdi qabyldaýǵa barlyq qajetti jaǵdaıdy qamtamasyz etý qajet, — dedi Aıdarbek Saparov.
Eske salaıyq, buǵan deıin Qazaqstanda egin oraǵy naýqany bastalǵanyn habarlaǵanbyz.
