QTJ jelisinde múmkindigi shekteýli jandarǵa arnalǵan kýpesi bar 95 vagon qatynaıdy
ASTANA. KAZINFORM — Jyl basynan beri Ulttyq tasymaldaýshynyń poıyzdaryn 116 myńnan astam múmkindigi shekteýli jolaýshy paıdalanǵan. Bul týraly «Jolaýshylar tasymaly» AQ baspasóz qyzmeti málimdedi.
2023 jyldyń sáıkes kezeńinde múmkindigi shekteýli jolaýshylarǵa arnalǵan arnaıy kýpege 111 myń adam bılet satyp alǵan.
Qazirgi ýaqytta Qazaqstannyń temirjol jelisinde múmkindigi shekteýli jolaýshylarǵa arnalǵan kýpesi bar 95 shtabtyq vagon qatynaıdy.
«Mamandandyrylǵan vagondardyń qurylymy kótergish qurylǵylardy, yńǵaıly tambýr aımaqtaryn jáne jolaýshynyń múgedek arbasymen qozǵalýyna múmkindik beretin dálizderdi qamtıdy. Múmkindigi shekteýli jolaýshylarǵa arnalǵan kýpede jolaýshyǵa jáne ony ertip júrgen adamǵa arnalǵan arnaıy bekitpeler bar. Sondaı-aq, arnaıy dárethana bólmesinde jolaýshynyń yńǵaılylyǵy úshin tutqalar men tómen ornalasqan qol jýǵysh qarastyrylǵan», — delingen habarlamada.
Múmkindigi shekteýli jolaýshylardyń saparlarynyń qoljetimdiligin arttyrý maqsatynda arnaıy jeńildikter bar. Áleýmettik mańyzy bar marshrýttar, kommertsııalyq poıyzdarda jáne múgedektigi bar jolaýshylarǵa arnalǵan mamandandyrylǵan kýpesi bar «Talgo» poıyzdarynda barlyq toptaǵy múgedekter men olardy ertip júrgen adamdarǵa 50% jeńildik qarastyrylǵan.
Eske sala keteıik, ótken jyldyń 1 qyrkúıeginen bastap erekshe qajettilikteri bar adamdarǵa arnalǵan temirjol bıletterin onlaın satyp alý joldary jeńildetildi. Endi jeńildik bıletterin rásimdeý úshin áleýmettik ID-nyń 6 tańbaly kodyn kassada kórsetýdiń qajeti joq. Jeńildik bıletterin alý úshin JSN men múgedektik týraly anyqtamanyń nómirin onlaın engizý jetkilikti.
