QTJ: Wabtec-pen kelisimge Ulttyq qor men BJZQ-dan aqsha almaımyz

ASTANA. KAZINFORM — «Qazaqstan temirjoly» ulttyq kompanııasy amerıkalyq Wabtec kompanııasymen aradaǵy 4,2 mlrd dollardyń kelisimshartyn oryndaýǵa qarajatty qaıdan alatynyn málim etti.

— Investıtsııalyq qajettilikterge, ıaǵnı 2027-2036 jyldary teplovozdardy satyp alýǵa qaryz tartý josparlanǵan. Bul rette BJZQ ne Ulttyq qor qarajaty tartylmaıdy. Teplovozdardy satyp alý paıdalanýdan shyǵarylatyn parkti aýystyrýǵa baılanysty jáne josparlanǵan tasymaldaýdy lokomotıv tartymymen qamtamasyz etý qajettiligin qanaǵattandyrý maqsatynda kommertsııalyq qajetti joba bolyp tabylady. Qaryzdardyń jáne ınvestıtsııalardyń qaıtarymy kelisimshart jasasý kezinde sózsiz qarastyrylǵan, — delingen QTJ-nyń Kazinform saýalyna joldaǵan jaýabynda.

Sondaı-aq, ulttyq kompanııadaǵylar 4.2 mlrd dollar somaǵa qatysty qosymsha túsinikteme usyndy.

— Bul — 2058 jylǵa deıingi kezeńge lokomotıvterdi satyp alý men servıstik qyzmet kórsetýdi qosa alǵandaǵy úsh kelisimsharttyń jalpy somasy. Lokomotıvterdi satyp alý dástúrli túrde ózdik jáne qaryz qarajattarynyń kombınatsııasy esebinen júzege asyrylady. Servıstik shyǵystar aǵymdaǵy operatsııalyq shyǵyndar bolyp tabylady, olar óz qarajatynan tólenedi, bul qajettilikterge kredıtter tartylmaıdy. 4 mlrd. AQSh dollary 300 birlik lokomotıv satyp alýdy ǵana emes, sonymen qatar qoldanystaǵy servıstik shartty 15 jyl merzimge 405 birlik lokomotıvke uzartýdy, sondaı-aq sońǵy lokomotıvtiń servıske qoıylýyn eskere otyryp, satyp alynatyn 300 birlik lokomotıvke 18 jyl merzimge tolyq servıstik qyzmet kórsetýdi uıymdastyrýdy qamtıdy, — dep jazylǵan qosymsha málimette.

Buǵan deıin QTJ Wabtec-pen kelisimde kórsetilgen 4,2 mlrd dollar 300 vagonnyń ǵana quny emestigin málimdegen edi.