«QTJ» UK Qostanaı fılıalynyń basshylary qamaýǵa alyndy

QOSTANAI. QazAqparat - Qostanaı qalasynyń tergeý soty para aldy degen kúdikke ilingen «Qazaqstan temir joly» AQ - «Júk kóligi» oblystyq fılıaly qyzmetkerlerine qatysty sanktsııalardy qarady, dep habarlaıdy QazAqparat oblystyq sottyń baspasóz qyzmetine silteme jasap.

«Qazaqstan temir joly» ulttyq kompanııasynyń Qostanaı fılıalynyń basshylary para alý sátinde ustaldy. Seriktestiktiń birin vagondarmen ýaqytyly qamtamasyz etkeni úshin fılıal bastyǵyna para bermek bolǵan.

«2019 jylǵy 3 aqpanda Qostanaı qalasynyń mamandandyrylǵan tergeý soty oblystyq PQKK-niń sybaılas jemqorlyqqa qarsy qyzmetiniń aǵa tergeýshisi Tórehanovtyń «Qazaqstan temir joly» AQ fılıalynyń basqarý júıelerin avtomattandyrý jónindegi dırektordyń orynbasary - «Júk tasymaldaý» - «Qostanaı júk tasymaldaý bólimi» basshysy Qurmanalıevke qatysty kúzetpen ustaý túrindegi bultartpaý sharasyn sanktsııalaýǵa ruqsat berdi. Sondaı-aq Qostanaı stantsııasy bastyǵynyń orynbasary Almatovqa qatysty úıqamaqqa alý túrindegi aldyn alý sharasyn sanktsııalaý týraly ótinishin qanaǵattandyrdy», - delingen oblystyq sottyń baspasóz habarlamasynda.

Sot sheshimi boıynsha Qurmanálıev 10 táýlik boıy qamaýda bolady, al, ekinshi kúdikti Almatov 2 aı úıqamaqqa alyndy. Sonymen qatar, «Qazaqstan temir joly» AQ - «Júk kóligi» oblystyq fılıalynyń dırektory B.Qaıdarov ta ustaldy.

Qaıdarov QR Qylmystyq kodeksiniń 366-baby, 3-bóligi, 2-tarmaǵynda, 366-baby, 3-bóligi, 2,4-tarmaqtarynda, 366-baby, 3-bóligi, 4-tarmaǵynda kórsetilgen quqyq buzýshylyqtar úshin aıyptalýda. Ol 2 aı boıy qamaýda ustalatyn bolady.