«QTJ» UK» AQ men «Etihad Rail» (BAÁ) kólik-logıstıka salasyndaǵy baılanysty qalyptastyrýǵa múddeli

ASTANA. QazAqparat -  «Qazaqstan temir joly» UK» AQ prezıdenti Qanat Alpysbaev Qazaqstannyń tranzıttik múmkindigimen jáne kólik- logıstıkalyq ınfraqurylymymen tanysýǵa kelgen «Etihad Rail»(BAÁ) temirjol kompanııasy delegatsııasymen kezdesti.

 Júzdesý barysynda Q. Alpysbaev temirjol, teńiz porty, áýejaı ınfraqurylymy, kólik-logıstıkalyq ortalyqtaryn basqaryp otyrǵan Kompanııanyń mýltımodaldyq kólik-logıstıkalyq qyzmetin kórsetý barysymen habardar etti. 

Q. Alpysbaev «QTJ» UK» AQ-nyń Qazaqstan ekonomıkasyn damytýdaǵy mańyzyn aıta kelip, Kompanııanyń el áleýetin damytýdaǵy júzege asyryp jatqan tranzıttik jáne eksporttyq jobalaryna toqtaldy. Qazirgi kezde temirjol kóligi mashınasyn jasaý salasy serpindi damýda. Álemdik jetekshi kompanııalarmen birlesip otandyq temirjol kóligi óndirisi jolǵa qoıyldy.

 Qazaqstanda sońǵy úlgidegi júk jáne jolaýshylar vagondary, lokomotıv qurastyrylyp, relster, joldyń ústińgi qabatyna qajetti materıaldar shyǵarylady.

 «Etihad rail» Bas dırektory F. Mazrýzıdiń aıtýynsha, «temirjol kompanııalary arasyndaǵy baılanysty damytý  QR men BAÁ arasyndaǵy eki jaqty seriktestikti damytýdyń myńyzdy baǵyty bolyp tabylady».

 F. Mazrýzıdiń osy sapar barysyndaǵy Qazaqstannyń kólik-logıstıkalyq kesheni múmkindigimen tanysýdyń mańyzyn aıta kelip, «qazaqstandyq áriptesteriniń temirjoldy basqarý men qurylysyn júrgizýdegi tájirıbesin BAÁ temirjolyn damytýǵa tabysty paıdalanýǵa bolatyndyǵyn» atap ótti.

«Etihad rail» delegatsııasy «QTJ» UK» AQ qurylymdyq bólimsheleriniń qyzmetimen tranzıttik, ıntermodaldyq tasymaldaý logıstıkalyq qyzmetiniń bolashaǵymen tanysty, dep habarlaıdy «Qazaqstan temir joly» UK» AQ baspasóz qyzmeti. .

 «Etihad rail»  temirjol kompanııasynyń ókilderi   «Lokomotıv qurastyrý zaýyty» AQ, «Tulpar Talgo» JShS, «Qorǵas-Shyǵys qaqpasy» AEA nysandarynda boldy.