«QTJ» UK» AQ men Astana qalasy ákimdigi ózara seriktestik týraly Memorandýmǵa qol qoıdy
ASTANA. QazAqparat - «QTJ» UK» AQ men Astana qalasy ákimdigi ózara seriktestik týraly Memorandýmǵa qol qoıdy, dep habarlaıdy «QTJ» UK» AQ baspasóz qyzmeti.
Ózara seriktestik týraly Memorandýmda QR Úkimetiniń qańtarda bekitilgen «Ónerkásip kásiporyndaryn qoldaýdyń 2015 jylǵa arnalǵan josparly sharalary» týraly mańyzdy qujatty júzege asyrýdan týyndaǵan basymdyqty baǵyttary kórsetildi. Onyń ishine qazaqstandyq úlesti tıimdi damytý, Astana qalasynyń taýar óndirýshileriniń ónimderiniń sapasyn kóterip, túrlerin kóbeıtýdi qamtamasyz etý kiredi.
Kompanııa 2015 jyly elordadaǵy kásiporyndardan satyp alynatyn taýarlar men qyzmet túrleriniń kólemin 49 mlrd. teńgege jetkizýdi kózdep otyr.
Astana qalasynyń kásiporyndarynan taýarlar men qyzmet túrlerin satyp alýǵa 15 mıllıard teńge bólý josparlanyp otyr.
«QTJ» UK» AQ prezıdenti Asqar Mamın men Astana qalasynyń ákimi Ádilbek Jaqsybekov Ózara seriktestik týraly Memorandýmǵa qol qoıdy.
Buǵan deıin, «QTJ» UK» AQ men respýblıkanyń toǵyz oblysy arasynda Ózara seriktestik týraly Memorandýmǵa qol qoıylǵan bolatyn. Barlyǵyn qosqanda, Ulttyq kompanııa 2015 jyly respýblıkadaǵy ónerkásip kásiporyndaryn qoldaýǵa shamamen 133 mıllıard teńge bólýdi josparlap otyr.
