«QTJ» UK» AQ: Apatqa ushyraǵan poıyzda zardap shekkenderge barlyq kómekter kórsetiledi
ASTANA. QazAqparat - Jambyl oblysynda apatqa ushyraǵan poıyzda zardap shekkenderge barlyq qajetti kómekter kórsetiledi. Bul týraly «Qazaqstan temir joly» UK» AQ Basqarma tóraǵasy Qanat Alpysbaev brıfıng barysynda málim etti, dep habarlaıdy QazAqparat.
18 maýsymda Jambyl jol bólimshesiniń Shý stansasynda «Qazaqstan temir joly» UK AQ Basqarma tóraǵasy Qanat Alpysbaev, QR IDM Kólikterdi baqylaý komıtetiniń tóraǵasy Áset Asaýbaev, № 9 «Astana-Almaty» jolaýshylar poıyzynyń joldan shyǵyp ketýine qatysty oqıǵa boıynsha jýrnalıstermen brıfıng ótkizdi. Sondaı-aq, brıfıngke Jambyl oblysy Tótenshe jaǵdaılar departamentiniń ókilderi de qatysty.
«Qazaqstan temir joly» UK» AQ Basqarma tóraǵasy Qanat Alpysbaev zardap shekkenderdi qoldaýdyń barlyq múmkin sharalary jasalyp jatqandyǵyna toqtaldy.
Qazaqstan Respýblıkasy zańnamasy bekitken tólemderden ózge, «Qazaqstan temir joly» ulttyq kompanııasy qaıǵyly jaǵdaı bolǵan otbasyna 2 mıllıonnan astam teńge, zardap shekkenderge alǵan jaraqattarynyń densaýlyǵyna keltirgen zalalynyń aýyrlyǵyna baılanysty 500 myń teńgeden 1 mıllıon teńgege deıin beriledi.
Sondaı-aq, jolaýshylar «Jolaýshylar tasymaly» AQ-nyń «NSK» saqtandyrý kompanııasymen ótken jyly jasasqan kelisimshartyna oraı tıisti ótemaqy ala alady. Saqtandyrý kompanııasynyń qosymsha ótemaqy tóleý máselesi «QTJ» UK» AAQ-ynyń erekshe baqylaýynda tur.
Q. Alpysbaevtyń aıtýynsha, «QTJ» UK» AQ janynan jedel shtab quryldy. Ol vagondardyń joldan shyǵyp ketýine qatysty barlyq zardaptardy joıýdyń sharalaryn úılestiredi.
Oqıǵa bolǵan jerde 9 ártúrli tehnıkalar men 300-ge jýyq temirjolshy qalpyna keltirý jumystaryn júzege asyrýda. Poıyz qozǵalysy ekinshi jolmen júrgizilýde.
Arnaıy komıssııa oqıǵanyń sebebin saraptaýda. Onyń nátıjesi qosymsha habarlanady.
«Qazirgi kezde jol teliminiń ınfraqurylymy tehnıkalyq tekserýden ótkizilýde. Jyljymaly quramnyń ınstrýmentarlyq ólshemi jasalýda. Saraptaý nátıjesi zerdelenýde»,-deıdi kompanııa basshysy.
«QTJ» UK» AQ qyzmettik tergeý amaldaryn júrgizýde. Soǵan oraı oqıǵanyń sebebi saralanady. Temirjol telimi túgeldeı lokomotıvter men vagondardyń jaǵdaıy tekseriledi. Poıyz qozǵalysynyń qaýipsizdigine talap kúsheıtildi.
«Bolǵan oqıǵaǵa qatysty Bas kólik prokýratýrasynyń qadaǵalaýymen quqyq qorǵaý organdary qylmystyq is qozǵady»,-delingen «Qazaqstan temir joly» UK» AQ baspasóz qyzmetiniń málimetterinde.
