QTJ «Talgo» poıyzynda zábir kórgen azamatshaǵa moraldyq shyǵyn tóleı me
NUR-SULTAN. QazAqparat - «Qazaqstan temir joly» ulttyq kompanııasy tóraǵasynyń birinshi orynbasary Qanat Álmaǵambetov «Talgo» poıyzyndaǵy rezonansty qylmys boıynsha kimderdiń jazaǵa tartylǵanyn BAQ ókilderine aıtyp berdi, dep habarlaıdy QazAqparat tilshisi.
Áýeli QTJ ókili jolserikterden zábir kórgen jolaýshyǵa qaı jaǵdaıda moraldik shyǵyn tóleıtinderin aıtty.
«Sot aıaqtalǵanymen, úkim áli kúshine engen joq. Úkim kúshine engennen keıin oǵan tolyq quqyqtyq baǵa beriletin bolady. Ótemaqy tóleý máselesi zańnamaǵa sáıkes júzege asatyn bolady. Eger sot «Qazaqstan temir joly» ulttyq kompanııasy osynshama somada moraldik shyǵyn tóleýi kerek degen sheshim shyǵarsa, biz tóleýge daıynbyz», - dedi Qanat Álmaǵambetov.
Onyń aıtýynsha, osy oqıǵadan keıin jolserikterden bólek basshylyq laýazymdaǵy birneshe qyzmetker jumystan qýylǵan.
«Eki jolserik byltyr jumystan qýylǵan bolatyn. Poıyz bastyǵy da qyzmetten alastatyldy. Jýyqta ǵana qosymsha taldaý júrgizildi. «Jolaýshylar tasymaly» AQ bas dırektorynyń jolserikter rezervine jaýapty orynbasaryna qatań sógis jarııalanyp, departament dırektory jumystan qýyldy. «Jolaýshylar tasymaly» AQ-nyń Aqtóbe oblystyq fılıalynyń dırektory qyzmetten alyndy», - dedi ol.
