QTJ shattl-poıyzdarmen Qytaıdan Túrkııaǵa gýmanıtarlyq júk jetkizedi

ASTANA. QazAqparat – «Qazaqstan temir joly» UK» AQ shattl-poıyzdarmen Qytaıdan Túrkııaǵa gýmanıtarlyq júk jetkizedi, dep habarlaıdy QazAqparat kompanııanyń baspasóz qyzmetine silteme jasap.

«Transkaspıı halyqaralyq kólik baǵyty (THKB) boıynsha Qazaqstan arqyly Qytaıdan Túrkııaǵa shattl-poıyzdarmen gýmanıtarlyq júk tıelgen 200 konteıner jetkiziledi. Qazaqstan arqyly jedel jetkizý Memleket basshysy Qasym-Jomart Toqaevtyń tapsyrmasymen uıymdastyryldy. Qazaqstan aýmaǵy boıynsha poıyz rekordtyq qysqa merzimde – 90 saǵatta júrip ótedi», - delingen málimette.

QTJ aqparatyna súıensek, birinshi poıyzda salmaǵy 40 fýttyq 50 konteıner bar. Konteınerlerge jer silkinisinen zardap shekken adamdardy ýaqytsha ornalastyrýǵa arnalǵan shatyrlar tıelgen.

«Taǵy 150 konteıner jóneltiledi dep josparlanýda. «KTZ Express» AQ shattl-poıyzdardyń operatory bolyp tabylady», - delingen kompanııa habarlamasynda.

Aıta keteıik, shattl-servıstiń paıda bolýymen QHR-dan Grýzııa porttaryna deıin júkterdi jetkizý merzimi úsh esege – 18 táýlikke deıin, Túrkııa porttaryna – 25 táýlikke deıin qysqardy. Qazaqstan terrıtorııasynda júk Kaspıı teńizine (Aqtaý porty) deıin jetkiziledi, odan ári Ázerbaıjan, Grýzııa, Túrkııanyń Mersın qalasyna deıin jóneltiledi.

Bul tasymaldaýdy THKB marshrýtyna qatysýshy taraptar Túrkııaǵa gýmanıtarlyq kómek kórsetý sheńberinde óteýsiz negizde júzege asyryp otyr.