QTJ poıyzdar qozǵalysynyń ózgerýine qatysty túsinik berdi

NUR-SULTAN. QazAqparat – «Qazaqstan temir joly» ulttyq kompanııasynyń basqarma tóraǵasynyń birinshi orynbasary Qanat Álmaǵambetov elimizdiń aýmaǵyndaǵy poıyzdar qozǵalysyna túsinikteme berdi, dep habarlaıdy QazAqparat tilshisi.

«Qazirgi kezde temirjol jelileri shtattyq rejımde jumys istep jatyr. Poıyzdardyń qaýipsizdigi qamtamasyz etilgen. Alaıda jekeleı destrýktıvti adamdardyń quqyqqa qaıshy is-qımyldaryna baılanysty jolaýshy jáne júk poıyzdaryn ótkizýge qatysty problema bar», - dedi Qanat Álmaǵambetov Ortalyq kommýnıkatsııalar qyzmetinde.

Onyń aıtýynsha, 4 qańtardan Muqyr, Maqat, Qulsary, Ózen, Aral-Teńiz, Qazaly, Qazaqstan, Sekseýil, Beıneý, Mańǵystaý, Áıteke bı stantsııalaryndaǵy temirjolda jolaýshylar ári júk poıyzdary qozǵalysy ýaqytsha toqtatyldy

«Búgin tańerteń Muqyr, Jem, Qazaqstan, Ózen, Qazaly, Áıteke bı stantsııalarynda poıyz qozǵalysy jandandy. QTJ jedel shtaby Kólik komıtetiniń kelisimimen 25 jolaýshy poıyzynyń qozǵalysy toqtatylyp, 13 poıyz qosyndarǵa qaıtaryldy. Sonymen qatar 10 jolaýshy poıyzy Qazaly, Sekseýil, Qyzylorda, Qandyaǵash, Tóretam, Jezqazǵan stantsııalary joldarynda turyp qaldy», - dedi ol.

Qanat Álmaǵambetovtyń sózine qaraǵanda, bul quramdardaǵy jolaýshylardy qazirgi kezde mejeli stantsııalarǵa jetkizý múmkin bolma tur. Quramdar toraptyq stantsııalarǵa ýaqytsha ornalastyryldy.

«Bul poıyzdardyń jolaýshylaryna sý jáne tamaqpen qamtamasyz etilip jatyr. Poıyzdarǵa qajetti kómir jetkizildi. Jergilikti jerlerde kómek kórsetip jatqan ákimdikter men eriktilerge alǵys aıtqym keledi», - dedi ol