QTJ poıyzdarda ushaqtaǵydaı tamaqtaný júıesin engizýdi josparlap otyr
ASTANA. KAZINFORM – Qazaqstanda jolaýshylar poıyzdaryndaǵy tamaqtaný qyzmetine ózgeris engizý josparlanyp otyr. Bul týraly «Jolaýshylar tasymaly» AQ basqarma tóraǵasy Ánýar Ahmetjanov Astanadaǵy «Nurly jol» vokzalynda ótken jıynda aıtty.
Onyń aıtýynsha, ulttyq tasymaldaýshy jolaýshylarǵa tamaq usynýdyń jańa tásilderin qarastyryp jatyr.
– Aldaǵy ýaqytta tamaqtaný qyzmetin jetildirýdi josparlap otyrmyz. Atap aıtqanda, ushaqtardaǵydaı tamaqtaný júıesin jasaǵymyz keledi. Taǵamdar shaǵyn portsııamen, jolaýshylarǵa yńǵaıly etip usynylady. Al qalaǵandar qosymsha portsııaǵa tapsyrys bere alady, – dedi Ánýar Ahmetjanov.
Sonymen qatar kompanııa jolaýshylarǵa poıyzda otyryp, jetkizý qyzmetteri arqyly qalaǵan taǵamyna tapsyrys berý múmkindigin usynýdy kózdep otyr.
Ánýar Ahmetjanovtyń aıtýynsha, mundaı qyzmetterdi damytýǵa poıyzdarda spýtnıktik ınternettiń iske qosylýy múmkindik beredi. Jolaýshylar jol ústinde tamaqqa tapsyrys berýmen qatar, vokzalǵa aldyn ala taksı shaqyryp, ózderine qajetti onlaın qyzmetterdi paıdalana alady.
– Internet biz úshin túpki maqsat emes. Bul – jańa qosymsha qyzmetterdi damytýdyń negizi. Qozǵalystaǵy poıyzda turaqty tsıfrlyq baılanystyń bolýy buryn bolmaǵan múmkindikterge jol ashady, – dedi basqarma tóraǵasy.
Ázirge ushaqtardaǵydaı tamaqtaný júıesiniń naqty qashan engiziletini aıtylǵan joq.
Aıta keteıik, buǵan deıin Qazaqstanda 51 baǵyt boıynsha qatynaıtyn 108 poıyz quramyndaǵy 1500-den astam vagon Starlink spýtnıktik ınternetimen jabdyqtalǵany habarlandy.
